Ayera mainta, Prins Bernhard Cultuurfonds Caribisch Gebied (PBCCG) a realisa un conferencia di prensa cu e presencia di varios miembro di e organisacion pa asina informa comunidad tocante e creacion di un Fonds op Naam (FON) nobo bou nan maneho y e firma di un convenio.

Ayera 2 di juni tabata un dia special pa Prins Bernhard Cultuurfonds Caribisch Gebied unda nan a introduci loke nan ta yama ‘Fonds op Naam’, esaki ta nifica un fondo riba nomber di un compania, fundacion of un persona individual, cu den e caso aki ta trata di famia Koeman unda cu nan lo brinda oportunidad na un otro grupo pa haya subsidio por medio di bondad di otro personanan den comunidad, segun loke Alice van Romondt miembro honorario di directiva a señala.

Paola Koeman representante di famia Koeman den e Fonds op Naam a indica cu nan como famia ta mira arte y cultura na Aruba hopi importante y nan a haya hopi peticion pa iniciativanan cultural, pa e motibo ey nan a dicidi di duna un man na area cultural di Aruba di un forma structural.

Koeman a informa cu nan a dicidi di duna un aporte na PBCCG unda nan lo enfoca riba arte di tarima di desaroyo di teatro pa mucha, desaroyo di plataforma pa musiconan, bailadonan y contadonan di cuenta, specialmente e grupo cu ta presta calidad, pero cu no ta suficiente visibel pa publico en general.

Melanie Sloot chef de bureau di PBCCG a expresa cu e organisacion aki ta un fondo cu ta sostene proyectonan di arte, cultura y naturalesa riba e seis isla di Caribe Hulandes (Corsou, Aruba, Sint Maarten, Bonaire, Sint Eustatius y Saba) caminda organisacionnan, famianan of personanan individual cu tin e posibilidad financiero tambe por crea un Fonds op Naam pa asina ey por duna back na comunidad.

Pa cu esaki, el a splica cu personanan por traha un plan na nan deseonan y asina crea un Fonds op Naam cu ta loke e famia aki a haci, ademas el a trece dilanti cu pa haci un peticion ciudadanonan di Aruba of fundacionnan cu tin un idea pa un proyecto cu ta tuma luga na Aruba y cu ta cumpli cu e criterionan di e Fondo di Famia Koeman, por aplica for di ayera mes pa un ayudo financiero te maximo Afl. 5000,00 pa proyecto riba e website di PBCCG www.pbccaribbean.com y yena e formulario respectivo. Tur e peticionnan ta bay riba nan website y tambe ta entrega e proyecto di e mesun manera.

Di su parti, Lourdes Croes cu ta fungi como vice voorzitter di PBCCG a señala cu nan ta un fondo pa e seis isla di Caribe Hulandes caminda nan tarea ta arte, cultura, monumentonan, naturalesa entre otro areanan cu ta wordo subsidia pa proyectonan pa salvaguardia nan den nan totalidad cu mas desaroyo y estimulo, dunando prioridad na actividadnan den cual auto motivacion ta hunga un rol importante.

Tambe el a bisa cu nan tin un par di aña cu tin fondonan riba nomber di personanan y organisacionnan cu den total tin 11 den e seis isla y na Aruba 2 so unda cu nan ta hopi contento cu e famia aki cu a dicidi di aporta na e desaroyo di arte y cultura na Aruba.

“Nos ta contento pasobra esaki ta un estimulo pa e grupo di artistanan y grupo di performance cu pa hopi biaha nan tin hopi idea pero nan no sa con pa yega na cristalisa esakinan, nos ta espera cu e fondo aki lo ta un ayudo pa nan tambe” Croes a menciona.

Den e conferencia di prensa nan a firma un convenio cu un donacion pa un aña enfoca riba Aruba so y despues nan lo sigui pa tres aña mas pa asina ey wak si por yuda e otro islanan tambe, unda cu cada aña e presupuesto lo mester wordo usa.

Famia Koeman ta un famia cu a bin Aruba for di Hulanda hopi tempo pasa unda cu e tata di Paola Koeman ta un comerciante envolvi den area di restaurantnan di Aruba e cual a mira cu e iniciativa aki ta un forma di duna back na comunidad, manera el a sigura.

For di 68 aña pasa y pa cada aña Prins Bernhard Cultuurfonds Caribisch Gebied ta sostene mas di 170 proyecto di personanan individual, companianan of fundacionnan den e areanan menciona caba.