Diabierna mainta Vice president di Refinery, Commerce and Supply di PDVSA, Jesus Luongo tabata un di esun cu a papia dilanti e grupo di invitadonan di e apertura oficial di Citgo Aruba pa opera e refineria na San Nicolas.
Sr. Luongo su discurso a hala basta atencion, ora cu el a referi no unicamente riba e parti corporativo tocante e beneficionan cu e tipo di acuerdo aki lo trece pa Aruba y su pais. Pero tambe el a referi riba e pensamento socialista di e gobierno Bolivariano di Venezuela bou presidencia di Nicolas Maduro.
Nan no a bin gewoon pa haci business como otro tipo di compania strictamente comercial cu ta bandona un pais sin worry cu e pueblo. Sino cu nan consenshi ta diferente, ya cu nan ta defende e principionan di e revolucion Bolivariano. “Nan ta principionan di construi un pais cada dia miho. Construi un socialismo y construi e maximo felicidad pa nos pueblo”, el a bisa.
El a pidi disculpa pasobra nan Minister di e poder popular encarga cu PDVSA, no por a bini pa e ceremonia aki. P’esey el a bini pa reemplas’e den e acto aki.
Acuerdo y gobierno Bolivariano
Sr. Luongo a laga sa cu e acuerdo aki logra entre ambos gobierno, y tambe cu nan filial Citgo a haya e aprobacion di e gran mayoria di Parlamento di Aruba cu ta representante di nos pueblo. “Kiermen cu e pueblo di Aruba den su gran mayoria a bisa SI, nos ta di acuerdo cu esaki. Si!, nos kier habri e refineria aki. Si!, nos kier un futuro miho”, el a bisa. El a felicita ambos team cu a traha pa logra e acuerdo aki, y el a encurasha nan pa sigui traha duro pa pone e refineria den operacion bek.
E ehecutivo aki a laga sa cu Citgo tin un experiencia grandi riba e trabou di refineria na Merca, pero “cu tur e support di PDVSA”.
El a laga sa cu diabierna tabata un mainta pa celebra un echo historico cu ta e reapertura di e refineria. Sinembargo el a indica cu e tema di reapertura ta “apenas un pequeño grano” riba e posibilidad di fortalece e relacion estrecho entre e pueblo di Venezuela y e pueblo di Aruba.
“Esaki basa den e doctrina nobo di e gobierno revolucionario di e gobierno Bolivariano cu ta e solidaridad y complementarity”.
El a bisa cu ora e pueblo di Venezuela ta haci negoshi of entabla relacion, nan ta carga e bandera di nan personahe historico manera Miranda; y tambe di nan Libertador, Simon Bolivar, riba e soño di e patria grandi Latino Americano. “Un pueblo so, un cultura so y un interes so.”
Sr. Luongo a agrega cu Aruba ta un pueblo ruman di Venezuela ya cu nan ta comparti reis comun. “Famia cu ta biba akinan na Aruba tin famianan na Venezuela y vice-versa. Incluso nos presidente di e Republica Bolivariana di Venezuela, Nicolas Maduro tin su famia akinan na Aruba. El a bin for di Aruba.”
Tambe el a bisa cu su “Comandante Eterno” Hugo Chavez a carga e bandera aki di bay den henter mundo cu e mision importante di construi “un solo pais y un patria so”. El a bisa cu e echo cu nan por habri e refineria aki ta apenas un prome paso, ya cu e ta habri un “abanico di posibilidadnan importante pa profundisa e relacion aki.
Igualmente el a laga sa cu pa loke ta e trabou den e refineria, nan lo facilita pa e mayoria di trahadonan lo ta di Aruba mes. Tambe el a papia di un impacto economico cu e refineria ta trece cu ne. “Pero cos cu ta bay mas aya. Ta e politica di e gobierno Bolivariano riba educacion, salud, transporte, recogiendo e bandera di Simon Bolivar. Cu un gobierno mester traha pa su pueblo y semper mester traha pa busca e felicidad maximo pa nan. Y esaki ta nos meta. Y mi ta kere cu akinan nos lo bay logra”, el a bisa.
Gas pa Aruba y ferry
Sr. Luongo a referi na e proyecto di gas cu e ta considera cu lo tin un impacto “incluso mayor cu e impacto cu e reapertura di e refineria tin”.
El a bisa cu e suministro di gas for di Venezuela lo crea un area di posibilidad tremendo pa Aruba, ya cu Venezuela tin e di 8 reserva di gas natural mas grandi di henter mundo.
E impacto aki tin di haber cu Aruba lo por bira un pais berde cu lo influencia positivamente su industria turistico. Pero tambe e gas lo tin su influencia pa e compania cu ta produci awa y coriente, ya cu e uzo di gas lo haci mas barata e costo di produccion cu ta nifica un beneficio directo pa e pueblo di Aruba, segun Sr. Luongo.
“Nan lo wak mehora nan calidad di bida pasobra nan lo aumenta nan poder adkisitivo.” Tambe e gas natural pa uzo di vehiculo. Na Venezuela tin 220 mil auto cu ta traha ya sea cu gas y/of gasolin. Pues e yegada di gas for di Venezuela pa Aruba ta nifica cu nos por uza gas pa core nos autonan cu ta resulta mas barata, y e ta contamina menos nos medio ambiente”. Te hasta e suministro di gas na domicilio tambe ta un posibel, enbes di e cilinder di gas cu ta wordo uza actualmente.
El a papia riba importancia di e refineria na San Nicolas pa e vision di PDVSA y di e gobierno Bolivariano di Venezuela. Pa medio di e refineria na Aruba, nan lo por probecha di haci uzo di e reserva grandi di crudo cu nan tin den e faha di “Orinoco Hugo Rafael Chavez Frias”. El 297 mil miyon di bari ta wordo calcula cu e reserva aki tin. E ta wordo considera como un di e reservanan mas grandi di henter mundo.
“E ta e crudo pisa, y esaki ta e crudo cu nos ta bay procesa akinan.”
Sr. Luongo ta haya cu e reserva aki ta dura mas cu 100 aña cu ta garantisa e operacion di nos refineria. Ademas el a bisa cu e acuerdo aki ta uno rentabel, y nos mester traha hunto pa e bira uno eficiente. Pero tur cos ta mustra no solamente e parti di rentabilidad sino e beneficio geo-strategico pa fortalece e lasonan cu lo bira uno excelente, el a señala.
Tambe el a expresa cu Aruba y Venezuela ta iremediablemente cerca y nos ta comparti hunto como bisiña, “pasobra nos ta dilanti”. Tambe e topico di e ferry a bin dilanti, y el a menciona e posibilidad di bin cu un ferry entre ambos pais. “Nos ta compronde cu tin compania priva cu kier bin cu un ferry locua lo yuda.” E ta trata di e ferry Naviera Paraguana, e proyecto aki ta uno PPP entre sector publico y gobierno regional di estado Falcon y gobierno nacional di Venezuela, asina e corant El Universal di Venezuela a informa recientemente.
