Pa un tempo caba Bon Dia ta publicando riba e situacion di e refineria a base di entre otro entrevistanan cu e sindicato IOWUA. Nos a trece como primicia cu e proyecto ta den ‘slow down’ y finalmente ayera Citgo a confirma esaki. Despues gobierno a duna un miho aclaracion: e proyecto ta para.

Prome minister Evelyn Wever-Croes (MEP) a reacciona ayera despues e relato di Citgo atardi a yega prensa. Ya den oranan di mainta gobierno a tende den un reunion cu ehecutivonan di Citgo cu ‘debi na e sancionnan cu Merca a impone riba Venezuela, pa Citgo Aruba ta birando dificil y por bisa te hasta practicamente imposibel pa haya financiamento pa por cumpli cu e contract di rehabilitacion di e refineria pa esaki habri bek’.

“E decision aki ta debi na e impasse cu tin entre e gobierno Mericano y gobierno Venezolano, cua Aruba no tin arte ni parte den dje. Sinembargo ta debilita e posibilidad pa e refineria habri bek. Citgo no sa ainda con largo esaki lo dura y cuanto tempo nan tin mester pa e impasse aki wordo soluciona pero tin e speransa cu esaki tuma luga pronto, sinembargo Citgo no por a duna gobierno ningun siguridad”, asina e relato di gobierno ta bisa.

Revisa contracto cu Citgo

Segun e prome minister: “Plannan di gobierno ta sigui pa revisa e contracto pa mira unda Aruba por ta mara na e contract aki ainda y ta spera tambe cu Citgo ta sali for di e situacion aki pronto pa asina gobierno tuma e decision riba e futuro di e Refineria.”

Ki pasonan concreto gobierno lo tuma, no ta conoci ainda. Nan ta ‘evaluando kico ta e siguiente pasonan pa tuma y ta keda monitor e situacion pa asina e miho decisionnan wordo tuma den bienestar di e pueblo di Aruba’, asina nan ta bisa.

Paramento versus slow down
Manera menciona Citgo den su comunicadonan ta papia di un ‘slow down’ y no paramento di e proyecto di rehabilitacion di e refineria.

Jim Cristman, vice presidente di Refinacion pa Citgo ta bisa” “Maske ta cu duele nos mester slow down e proyecto pa e proximo tempo, nos ta trahando duro riba un solucion y ta spera di por resumi cu full e proyecto den futuro cercano.”

Gobierno di Aruba y RdA a traha den bon cooperacion cu nos den e esfuerso aki, e ehecutivo tambe a declara.

Manera conoci nan a traha un mancamp pa 1200 trahado. Segun Citgo nan a emplea mas cu 600 trahado pero for di diferente otro fuentenan, Bon Dia ta compronde cu e cantidad aki ta hopi mas abou. Y cu awor sigur lo baha cu mas cu mita pa motibo di e paramento di e proyecto di rehabilitacion di e refineria na San Nicolas.

Manera conoci e refineria ta den man di gobierno pero a cera un contracto di huur cu Citgo.