Diasabra ultimo, Departamento di Salud Publico a informa tocante e suspension di actividadnan unicamente pa e dia ey di loke ta trata vacunacion pa motibonan di interupcion di coriente.
Pa cu esaki, Directie volksgezondheid (DVG) diasabra ultimo a informa cu e prikpost cu ta ubica na Centro Libertador Betico Croes mester a cera su portanan e dia ey mas trempan, sin duna mas detaye di kico por a pasa nan a pidi disculpa na comunidad pa cualkier inconveniencia cu esaki por a trece cune.
Ademas, diasabra ultimo tambe a keda conoci cu den e programa “Hangua Nacional di Vacunacion” tabata marca cu 58% di e poblacion a wordo vacuna caba, manera a keda conoci e meta ta pa yega na un porcentahe di 85% di henter poblacion.
Di loke ta trata e cantidad di vacuna, te diasabra ultimo pa 7.30 di anochi, 57.481 persona a wordo vacuna, 26.360 a haya nan prome dosis, 31.121 a haya e dos dosis y e total di personanan vacuna a yega na 88.602.
Tambe a keda conoci cu tur hende mayor di 18 aña por vacuna sin cu mester haci un cita, centronan di vacunacion como Centro Deportivo Betico Croes na Santa Cruz ta habri tur di dialuna te diasabra for di 8.30 di mainta te cu 7or di anochi, non stop y Teresita Center na San Nicolas desde 8.30 di mainta pa 11.30 y 1.30 te cu 4.30 di atardi.
A pesar cu nan ta tumando nota di e efectividad di e vacuna den e reduccion di casonan, nan a indica cu ta necesario pa esunnan cu ainda no a vacuna pa vacuna tambe. COVID no a disparce te ainda y esunnan cu no a vacuna ta sigui na risico pa contrae esaki y bira hopi malo.
