Prijsnan ta subiendo y lo sigui subi; Gremio Comercial ta pidi gobierno adapta e base pa calculacion di impuesto di importacion

Kamer van Koophandel en Nijverheid Aruba (KvK) hunto cu Aruba Trade & Industry Association (ATIA) y Comerciantenan Uni Aruba (CUA) a duna un conferencia di prensa pa trece dilanti nan preocupacion como gremio comercial pa loke ta trata aumento di prijs di productonan importa.

Omar Tromp presidente di (KvK) a comenta cu comercio tin un preocupacion grandi tocante asunto di carga, door di pandemia di Covid-19 e sistema di suministro for di fabrica, transporte interno di cada pais, container, wafnan, barconan, suppliers, entre otro, a wordo kibra un mas cu otro pa loke tin di haber cu e carga.

Segun Tromp esey ta nifica cu den lunanan aki por a mira un aumento basta drastico di e carga cu ta wordo cobra na comercio, “teniendo na cuenta cu practicamente nos ta importa tur cos, esaki ta encera cu pa comerciante y pa consumidor lo tin un aspecto inflacionario, es decir, cu cosnan ta birando mas caro caba”, Tromp a sigura.

El a insisti cu e preocupacion ta uno grandi y nan ta purbando di yega na un manera con pa mitiga esaki, nan tin un plan manera Tromp a comenta cu nan ta wardando pa gobierno nobo lo sinta pa asina ey nan por acerca na minister corespondiente.

Di mesun manera, el a informa cu esaki no ta algo cu ta sucede localmente, sino cu ta tumando luga na tur pais cu ta importa na unda cu e prijs pa container a subi, el a conta cu el haya informacion cu un container di China di 40 pia ta bay costa 20.000 dollar pero su prijs prome cu Covid-19 tabata entre 3.000 pa 4.000 dollar, loke ta trece cune un prijs halto di producto pero tambe un escasez di productonan na fin di aña.

Herryck Henriquez director di ATIA a splica cu nan tin basta tempo caba mirando con e prijsnan a subi, na mei ATIA a publica un comunicado tocante aumento di prijs di productonan local pero aworaki segun Henriquez, e prijsnan ta subi mas y mas y e temporada di Pasco ta biniendo na unda cu e expectativa ta cu lo subi hopi mas.

Tin tres rason di con e prijsnan ta subi mundialmente na unda cu e prome ta e interupcion den e cadena di suministro, di dos ta scarsedad di productonan pa hendenan pa benta y di tres ta e aumento di flete, (freight maritimo y continental).

Di interupcion den e cadena di suministro cu ta trata di fabricacion, transportacion, entre otro, a wordo kibra door di pandemia y door di esey hopi compania no tabata sa kico ta bay pasa den futuro nan a cuminsa ‘skill down’ y ora e demanda a cuminsa subi pa nan por ‘skill up’ tabata dificil pa nan por haya empleadonan atrobe, loke a causa e ora ey cu a yega scarsedad di productonan, ora esey ta pasa e prijs ta subi.

Nan a enfoca riba e parti di flete cu a subi pa motibo cu manera Henriquez a menciona esey ta door di algun problema cu tin mundialmente cu no tin containernan y pa via di esaki e prijs pa transporta productonan di China, di Merca of Aruba a subi, pa motibo cu no tin basta espacio pa productonan.

Francis Saladin presidente di Comerciantenan Uni Aruba (CUA) a comenta cu nan a dicidi di acerca otro como organisacionnan pa motibo cu nan tur ta comparti e preocupacion y nan ta mira e reaccion den media di e pueblo cu ta papia tocante e situacion di prijsnan.

E situacion di flete ta hopi preocupante pasobra esaki ta algo cu ta bay ta duradero”, el a sigura y ademas a expresa cu tin diferente circunstancianan cu ta afectando esaki na unda cu pandemia a trece un impacto grandi riba full e mundo di maneho di tur producto, como por ehemplo, industrianan di auto cu ta papia di scarsedad di chip pa e autonan por funciona debidamente.

Cerca nan, nan ta mira cu e productonan cu nan ta trece na Aruba for di Merca cu un container cu tabata bale anteriormente 3.000 dollar awor tin un balor di mas di 5.000 dollar, 40% mas caro.

Den esaki Saladin a indica cu nan ta wak como un solucion cu na Aruba, gobierno cobra invoerrechten riba flete, e manera cu nan ta calcula e invoerrechten ta riba e prijs di producto incluyendo e flete y esey ta haci e producto hopi mas caro.

Di mesun manera el a informa cu nan kier acerca gobierno pa wak si tin un manera sea cu si nan por bay back temporalmente na e uso di fletenan pre-covid, cu ta nifica usa e prijs di fletenan cu tabata anterior di e pandemia pa asina minimalisa e impacto cu tin den situacion aki.

“E idea ta cu nos kier bay na unda cu gobierno ta elimina completamente e invoerrechten riba flete y cobr’e solamente riba e producto”, Saladin a bisa.

Ta p’esey cu nan ta boga pa gobierno bin cu un solucion pa yuda, pasobra nan como comercio tanto nan por haci of por absorbe y minimalisa pero “gobierno ta ganando mas placa y mi ta kere ta parti di gobierno tambe pa entrega un parti back y yuda comunidad pa alivia e situacion, sinta cu nos, bin cu situacionnan pa alivia esaki, pasobra si no, mirando con nos ta bayendo, pa december ta bay ta un desaster prijsnan ta bay ta sumamente halto y nos ta hopi, hopi, preocupa”, Saladin a finalisa.