Tur siman nos ta publica e resultadonan di un poll riba un ponencia hunto cu un splicacion neutral di e topico.
Pa hopi aña caba, Aruba conoce loke ta yama e ‘canasta basico’, cu ta un lista di producto basico cu tin un prijs maximo fiha pa ministro encarga cu Asunto Economico. Esaki cu e meta cu tur consumidor, specialmente esunnan cu entrada modera, tin acceso na cierto producto basico na un prijs rasonabel.
Productonan di e canasta basico ta aroz, azeta dushi, margarina, manteca, cuminda pa baby, lechi en polvo, lechi di koffie, sucu, salo, koffie (instantaneo), te, hariña blanco y hariña di maishi. Tambe pan blanco (kipashi) y webo di galiña. Departamento di Asunto Economico ta responsabel pa eherce control den supermercado y minimarketnan. Ningun di e productonan aki por bende pa un prijs mas halto cu ley ta stipula. Esey ta inclui tambe BBO y BAZV, cu ta inclui den e prijs maximo caba. Problema ta cu den practica hende no tin na memoria henter e lista cu ta cay bao di e areglo aki. Bo ta yega na caha y ta posibel cu ta conta e productonan aki hunto cu e otro articulonan cu bo a cumpra, y ta cobra BBO/BAZV riba e suma total. Anto bo ta pagando dos biaha BBO/BAZV riba bo compra di producto cu ta parti di canasta basico.
Pregunta: bo ta di acuerdo cu mester bin un obligacion pa tur punto di benta di e productonan, manera supermercado y minimarket, tin na cada caha e lista di producto di canasta basico, cu mencion corecto di nan prijs?
Nota: na Curaçao tin un canasta basico hopi mas amplio cu esun di Aruba. Tambe e ta inclui un lista di 10 tipo di berdura fresco y 10 tipo di fruta fresco cu tambe conoce prijs fiho.
