E CPI pa luna di februari 2017 ta 116.58, loke ta representa un caida leve di 0.04% compara cu e indice di januari 2017 (116.63) y acumulando un caida di 1.2% te cu na februari di e aña aki.

E cambio di e CPI pa e ultimo diesdos (12) lunanan (februari 2016 te cu februari 2017) ta -0.3%, un subida di 0.3 punto di porcentahe (ppt) compara cu e periodo corespondiente di aña pasa (-0.6%). E promedio anual di e tasa di inflacion pa e periodo di februari 2016 te cu februari 2017 ta -0.8%, un caida di 1.0 ppt compara cu e 0.2% registra den e periodo di februari 2015 te cu februari 2016.

Cuminda y alcohol mas barata
Durante e luna aki, cinco (5) di e diesdos (12) sectornan a registra caida di prijs. E caidanan cu tawata tin e mayor efecto riba e CPI a wordo registra pa e sectornan di “Cuminda y bebida no-alcoholico” (-0.6%), “Recreacion y cultura” (-0.5%) y “Paña y sapato” (-0.6%), causando un efecto di -0.09, -0.04 y -0.03 ppt, respectivamente. E caidanan den e restante sectornan a contribui cu un efecto di -0.02 ppt riba e CPI di februari 2017. E caidanan aki a wordo contraresta parcialmente door di principalmente subidanan den e indicenan di e sectornan di “Transporte” (0.3%) y “Vivienda” (0.2%), cu a contribui cada uno cu un efecto di 0.05 ppt riba e CPI di februari 2017.

E subidanan den e sectornan restante a contribui cu un efecto di 0.04 ppt riba e CPI di Februari 2017. E caida den e sector di “Cuminda y bebida no-alcoholico” a wordo causa principalmente door di un caida di 0.7% den e categoria “Cuminda”, causando un efecto di -0.08 ppt. E caida den e sector di “Recreacion y cultura” a wordo causa principalmente door di un caida den e categoria “Vacacion” (-4.8%), causando un efecto di -0.03 ppt. E caida den e sector di “Paña y sapato” a wordo causa principalmente door di un caida di 0.5% den e categoria “Paña”, causando un efecto di -0.02 ppt.

Transporte mas caro
E subida den e sector di “Transporte” a wordo causa door di subidanan di 0.3% y 1.6% den e categorianan “Gasto relaciona cu uso di vehiculo di transporte personal” y “Servicio di transporte”, causando un efecto di 0.03 y 0.02 ppt. E subida den e sector di “Vivienda” a wordo causa principalmente door di un subida den e categoria “Mantencion y reparacion di vivienda” (0.8%), causando un efecto di 0.03 ppt.’

E canasta di consumo di e CPI ta consisti di 452 bienes y servicionan. Compara cu januari 2017, 31.2% di e bienes y servicionan aki a conoce un aumento di prijs causando un efecto di 0.34 ppt, mientras cu 29.9% ta mustra un caida di prijs, cu a contribui cu efecto di -0.39 ppt y pa e restante 38.9% no tawata tin cambio den prijs.

Prijsnan di bienes a baha cu 0.1% na februari 2017 y a causa un efecto di -0.06 ppt riba e CPI di februari 2017. Prijsnan di servicionan a conoce un subida di 0.05% y a causa un efecto di 0.02 ppt. E CPIC (core inflation) – CPI excluyendo e efecto di energia y cuminda – a registra na februari 2017 un subida di 0.6%, un caida di 0.6 ppt, compara cu e periodo corespondiente di aña pasa (1.2%).

Energia menos caro
E indice di energia – cu ta consisti di e productonan: electricidad, awa, gasolin y diesel a registra un caida di 6.5%, cu ta 3.0 ppt mas abou compara cu e periodo corespondiente di aña pasa (-3.5%). E indice di cuminda a registra un subida di 0.1%, cu ta 0.7 ppt mas abou compara cu e periodo corespondiente di aña pasa (0.8%).

Suma minimo pa biba
E suma minimo di biba pa un hogar consistiendo di dos (2) adulto y dos (2) mucha (edad 0-14 aña) na februari 2017 ta Afl. 4,314, mientras cu pa un hogar di un (1) adulto e suma ta Afl. 2,054. E sumanan aki tambe a baha.