Entidad Publico Saba ta agradecido pa e sosten cu gobierno Hulandes ta dunando pa yuda mitiga e prijs di coriente. Pero hasta cu e subsidionan aki, ta inevitable cu consumidornan ta bay mira e efectonan di e crisis energetico riba nan recibo di coriente pa motibo di prijs halto pa combustible.
Como parti di e subsidio mas recien di gobierno Hulandes di 15 miyon euro pa Bonaire, Sint Eustatius y Saba, e tarifa fiho pa electricidad ta bay keda cero na 2023. E tarifa fiho ya tabata reduci na cero pa medio di un subsidio pa e aña aki. E subsidio awo ta continua pa proximo aña. Gobierno Hulandes tambe ta bay subsidia mita di e aumento di e tarifa variable pa electricidad si e prijs surpasa $0.38 per KWh.
Consumidornan mester sa cu e tarifa variable ta bay keda depende riba e prijs di combustible y e tarifa cu Autoridad Hulandes pa Consumidor y Mercado (ACM) ta pone. Si e prijs di combustible ta aumenta, e tarifa ta aumenta.
E Conseho Ehecutivo a expresa gratitud na gobierno Hulandes pa e subsidio nobo, cual ta significante. Sin subsidio di Gobierno Hulandes y e subsidio di seis luna duna mediante Entidad Publico Saba, e recibonan di electricidad lo tabata substancialmente mas halto cu loke consumidornan ta paga awo.
E prijs halto pa coriente ta enfatisa e importancia di bira mas autosostenible y haci inversion den energia renobable. Ta importante pa continua reduciendo dependencia di Saba riba combustible fossiel pa reduci e prijs di coriente y tin un suministro confiable y sostenible di electricidad. E unico manera pa haci esaki ta pa inverti mas den fuentenan di energia renobable. Te cu logra esaki, prijs ta bay keda influencia grandemente pa prijs di combustible.
E 10 miyon euro adicional cu gobierno Hulandes ta poniendo disponible pa energia renobable na Saba ta bay yuda e isla alcansa un porcentahe di casi 90 porciento di energia renobable den futuro. E plan ta pa inverti den energia solar, di biento, y almacenahe adicional di bateria.
