Noticianan drentando for di Merca ta indica cu prijs halto di webo ta bay continua durante resto di aña, segun calculacionnan ta mustra, pa motibo di e griep aviar cu ta andando, y tambe inflacion.
Ta spera cu prijs di webo ta bay aumenta alrededor di 20 porciento na 2025, compara cu alrededor di 2.2 porciento pa prijs di cuminda en general, segun pronostico di prijs di Departamento di Agricultura Mericano (USDA). Carni, koffie y juice di apelsina ta entre e comestiblenan cu prijs mas halto, pero webo tin impacto unico di e variacion agresivo di prijs aviar, cu a pone presion riba e suministro, segun CNN ta reporta.
Mientras cu algun estado a scapa e brotenan di griep aviar di aña pasa, hopi a reporta un resurgencia di e virus cu a mata alrededor di 17.2 miyon galiña cu ta pone webo na november y december ultimo. Esaki ta casi mita di tur parha mata pa e virus na 2024, segun USDA.
E prijs averahe pa un dozijn di webo grandi categoria A na Merca tabata $4.15 na december, un aumento for di $3.65 na november, segun Bureau di Estadistica di Labor. Prijs di webo tambe a aumenta mas di 36 porciento comparando aña pa aña na december, segun e Indice di Prijs di Consumo Mericano.
“No pa ta esun cu ta duna mal noticia, pero nos ta bay keda asina pa un tempo,” segun Emily Metz, presidente di CEO di e Hunta Mericano di Webo. “Te cu nos tin algun tempo sin deteccion, desafortunadamente e suministro aki hopi, hopi preta di webo ta bay continua.”
Industria di webo a mira mas di 20 luna consecutivo di demanda halto na nivel record, segun Metz. E demanda, cu a aumenta pa motibo di dianan festivo, ta contribui na e aumento den prijs di webo.
Algun tienda na Merca, segun CNN, a pone limite riba con hopi webo un cliente por cumpra den un solo bishita. USDA a bisa den su revision di mercado di webo cu esaki ta un esfuerso pa alarga e suministro pasobra, manera Metz a describi, “hende a cuminsa cumpra webo den panico.”
“Hende ta reconoce e balor di webo, hasta cu un prijs un tiki eleva, y tambe ta hayando cu webo ta indispensable den nan bida diario,” Metz a bisa.
Tanten cu e griep aviar persisti, prijs halto ta bay continua. Tin brote na California, Indiana, Missouri, North Carolina y Ohio, USDA a bisa. Alrededor di 8.3 miyon parha a muri na januari pa motibo di e brotenan aki, segun USDA.
Productor y mayorista di webo tambe a aumenta nan prijs drasticamente den lunanan recien. Na New York, e prijs mayorista pa un carton di webo grandi a aumenta na $7.24 pa dozijn, mientras den Midwest a aumenta na $6.84. Na California, webo grandi a baha na $8.35 pa dozijn.
Esey ta costando e tiendanan, cu ta manteniendo prijs halto na nivelnan di record of casi record, USDA a bisa. Brotenan di griep aviar a plama na criaderonan unda ta cria parha pa pone webo, haciendo daño na e poblacion di parha hoben necesario pa contraresta e perdida di galiña cu ta pone webo.
Cautela rond mundo
Entre tanto, e luna aki Hapon a mata alrededor di 50mil galiña despues di un brote di griep aviar, cual tabata e di 19 brote di e malesa aki di e temporada na Hapon, segun Ministerio di Agricultura. Algun dia prome, criaderonan mester a mata 267mil parha.
Y den nos region, Organisacion Panamericano di Salud (PAHO) a lansa un tablero interactivo pa monitor e casonan di griep aviar den e region di continente Americano.
E pagina ta presenta tabel y mapa cu ta mustra e brotenan den humano como tambe parha domestico, silvestre y mamiferonan den e region, cu datonan obteni for di Organisacion Mundial di Sanidad Animal (OMSA). Asina ta reforsa e vigilancia activo pa preveni un posible transmision di e malesa na ser humano.
PAHO a publica tambe un cronologia riba griep aviar den e continente, cu ta inclui e eventonan clave desde 2020 te december 2024. Tur esaki ta refleha e importancia di colaboraicon regional y global pa monitor e propagacion di malesanan manera griep aviar y mitiga su potencial impacto.
Den e periodo te cu e di 19 siman di 2023, segun PAHO, autoridadnan di agricultura di Argentina, Bolivia, Brazil, Canada, Chile, Colombia, Costa Rica, Cuba, Ecuador, merca, Guatemala, Honduras, Mexico, Panama, Peru, Uruguay y Venezuela a detecta brote di griep aviar den parha domestico, granja avicola y of silvestre, y den mamifero. E deteccion di brote di e malesa den 15 pais di Latino America y Caribe ta un situacion nunca antes registra, segun PAHO, agregando cu e brotenan identifica ta ubica principalmente den e ruta migratorio di Pacifico.
Manera menciona, e griep aviar aki ta nifica cu produccion di webo den nos region tambe por keda afecta y cu esaki e prijs tambe por aumenta.
Prijs di webo na Aruba
Pa varios luna caba, ciudadanonan na Aruba ta preocupa pa e falta di disponibilidad y e prijsnan halto di webo na nos isla.
Localmente, no tin hopi cu por haci pa controla prijs di webo importa for di Merca y otro pais, ya cu e productornan di e pais mes ta stipula e prijs di nan producto.
September ultimo, Departamento di Asunto Economico (DEACI) a informa cu e prijs pa webo bruin local ta keda na Afl. 6.80 pa dozijn. Webo blanco ta bay na alrededor di Afl. 7.75 na algun supermercado local.
Sinembargo, consumidornan local ta critica constantemente cu no tin suficiente disponibilidad di webo produci localmente pa satisface e demanda, loke ta laga hopi ciudadano den un situacion unda mester paga prijs hopi cargo pa webo importa.
Segun CBS den su Indice di Prijs di Consumo di december ultimo, e indice di “lechi, keshi y webo” tabata entre e indicenan cu a registra un aumento “significante” den prijs (0.4%) den ultimo luna, y un aumento di 4.2 porciento compara cu december 2023.
Luna pasa, ciudadanonan tabata comparti riba rednan social potret di rekinan bashi unda no tin webo mas pa cumpra. Esaki pasobra apenas alrededor di 15 porciento di consumo di webo na Aruba ta bin di produccion local. Scarsedad di webo a cuminsa bira algo normal, a menos cu ta paga hopi caro pa e producto basico aki.
Bon Dia Aruba a tuma contacto cu prome minister, Evelyn Wever-Croes, pa puntra kico ta e plan di gobierno pa atende e situacion, mirando cu medionan Mericano ta reportando cu e prijs halto pa webo di nan pais no ta bay baha por lo pronto, y tin presion riba e suministro. Wever-Croes a indica cu lo pidi minister di Asunto Economico, Geoffrey Wever pa contesta e pregunta aki pasobra su ministerio ta atendiendo e situacion. Sinembargo, te ciere di e edicion aki, no a ricibi un contesta.
October ultimo, minister Wever a anuncia cu “23 empresario a demostra interes den produccion comercial di webo di galiña na Aruba.” El a bisa cu e meta ta pa aumenta produccion comercial.
“Segun informacion di Departamento di Asuntonan Economico, den 2023 un total di 738 mil webo di galiña a wordo produci pa comerciantenan local, cu ta representa 15% di e total consumo di webo a Aruba. E meta di e maneho di Ministerio di Asuntonan Economico ta pa redobla e cifranan di aña pasa y yega na 1.4 miyon di unidad pa aña 2026 mirando e potencial pa e industria aki crece.”
E tempo aya, Wever a bisa cu e siguiente paso lo bira “resolve e diferente retonan cu comerciantenan a indica, manera entre otro, ampliacion di tereno.” Sinembargo, no a ricibi mas informacion desde e tempo ey.
