Prijs di gasolin ta baha cu 42.5 cen y diesel cu 34.2 cen

Durante un conferencia dialuna mainta, Minister di Asunto Economico, Comunicacion y Desaroyo Sostenibel, Geoffrey Wever a anuncia cu prijs di gasolin y diesel lo conoce un reduccion cu lo drenta na vigor diaranson 10 di augustus 2022.

Den algun medio di comunicacion tabata circula e noticia cu prijs di gasolin y diesel lo baha e siman aki, y durante e conferencia di prensa, Minister Wever a confirma cu e noticia aki en berdad ta corecto.

E minister a anuncia cu e reduccion di gasolin lo ta di 42.5 cen pa cada liter bahando e prijs di gasolin na 2.93 cen pa liter. Esaki ta un reduccion di 12.7%. Pa loke ta trata e prijs di diesel, esaki lo baha cu 34.2 cen pa liter bahando e prijs di diesel na 2.78 cen pa cada liter di diesel na Aruba locual ta representa un reduccion di 10.9%.

Wever a remarca cu e prijs di gasolin y diesel ta algo cu no ta den man di Gobierno di Aruba y el a recorda cu na varios ocasion el a yega di splica e formula cu ta na luga pa determina e aumento of reduccion di prijs den combustibel. “A pesar cu nos ta contento cu e reduccion, tambe ta nos obligacion pa informa comunidad cu e ta algo cu ta basa riba desaroyonan internacional”, el a enfatisa.

Minister Wever a indica tambe cu gobierno ta contento pa wak cu e prijs internacional a cuminsa stabilisa y cu por ripara un reduccion directo na Aruba tambe, cual lo tin un impacto directo riba inflacion, riba e poder di compra y cartera di cada ciudadano na Aruba.

El a subraya cu nan ta consciente cu e peso riba comunidad ta hopi grandi y cu ya no tin espacio mas pa absorbe un aumento di costo di bida y prijs di gasolin y diesel ta algo cu ta forma un parti esencial den e patronchi di gasto di cada ciudadano. “E reduccion aki ta nifica cu inmediatamente cada ciudadano lo bay wak e efecto positivo den su cartera”, Wever a señala.

E Minister di Asunto Economico, Comunicacion y Desaroyo Sostenibel a splica cu na e momento aki e tendencia ta cu tin un reduccion, pero e prijsnan ta wordo estableci riba un promedio di cada luna y tur dia tin un impacto. Pa determina si tin aumento of reduccion e promedio di cada dia ta conta y e desaroyo ta depende di loke ta sucede riba e mercado internacional. “E ta un mercado hopi volatil, dus e por bay den tur direccion, pero nos ta spera cu e continua positivamente”, el a subraya.

E aumento di costo di bida tin un efecto grandi ariba pueblo y den e aspecto aki Minister Wever a remarca tambe cu como gobierno nan ta hopi preocupa pa e aumento di e costo di bida. El sigura cu inflacion ta algo cu nan ta monitor constantemente y por supuesto e aumento di prijs di awa cu coriente y tambe ta bay tin impacto riba inflacion.

Minister a detaya cu aworaki cu e reduccion di prijs di gasolin y diesel, y aumento di prijs di awa cu coriente lo tin un impacto sigur den luna di augustus di 4% riba inflacion. El a sigui splica cu Aruba tin un inflacion base di 3% pa 4% y segun calculacionnan probablemente e tarifa di inflacion pa luna di augustus ta bay ta entre 7% y 8%.

Na mesun momento el a enfatisa cu e cifranan di inflacion aki ta den tendencianan internacional y ta conforme cu locual ta sucediendo por ehempel na Hulanda caminda cu inflacion den luna di juni tabata 8.6% y den luna juli 10.3%. “Kiermen ora bo ta papia entre 7% cu 8% pa Aruba un pais cu ta importa tur cos, no ta mas cu locual ta sucediendo internacionalmente”, el a comenta.

Esey ta un factor importante pa considera y el a subraya cu no mester crea panico y wak e situacion manera cu e ta. Pues pa motibo ey, el a indica, nan ta monitor inflacion continuamente y aworaki tambe cu e aumento di prijs di awa cu coriente y reduccion di prijs di gasolin y diesel, inmediatamente a bay haci calculacionnan.

Pa loke ta e impacto di e aumento di awa cu coriente so, Minister Wever a indica esaki tin un impacto di 2.7% adicional, den e 4% cu a caba di menciona. E inflacion base ta entre 3% y 4% y e prijs di gasolin cada luna ta agrega na esey.

Pa loke ta pregunta ariba e uso di tankinan di reserva pa gasolin, e minister a splica cu nan a hiba e punto aki na RDA caba y puntra pa busca forma pa cumpra un volumen mas grandi y nan por purba baha prijs. Pero segun RDA a indica na gobierno, e tankinan no ta den condicion pa warda cantidad di liternan grandi di gasolin cu diesel y sumanan grandi mester wordo inverti, miyones, pa drecha e tankinan.

Esaki ta haci cu e e uso di e tankinan di reserva no ta un posibilidad realistico pa pone na corto plaso pasobra e ta bay costa hopi placa pa drecha e tankinan y fuera di esey e ta bay tarda hopi tempo prome cu e tankinan ta operacional. Incluso si gobierno dicidi di aloca fondo pa drecha nan, e suma ta cuantioso y e ta por lo menos 12 luna pa drecha e tankinan aki. E no ta un solucion tampoco a corto plaso.

Aumento di prijs di productonan di alimento ta contribui grandemente na e aumento di costo di bida en general. Pa loke ta trata control di prijs di productonan aki, Minister Wever a splica cu Aruba ta biba den un mercado liber y den mercado liber e comerciante ta establece su prijs y e consumidor ta dicidi unda e ta cumpra.

Pero esaki ta diferente den caso di e productonan cu ta cay den e canasta basico. Pa e productonan aki tin control ariba prijs regular cu ta tuma luga door di Departamento di Asuntonan Economico. “E control ey ta tuma luga, e prijsnan ta wordo publica y tin un mecanismo caminda pueblo por reporta ora cu tin infraccionnan”, Wever a agrega.

El a menciona cu algun luna pasa a aproba un ley den parlamento pa duna mas autoridad na Departamento di Asuntonan Economico den e parti di aplicacion den e caso aki. El a sigura cu e tema aki tambe tin atencion di gobierno.

“Control di prijs di productonan cu ta cay den canasta basico, esey ta tuma luga debidamente. Pa productonan cu no ta cay den canasta basico, productonan cu ta pertenece na mercado liber, gobierno no tin influencia den esey”, el a remarca.