(AFP) – Pa busca reduci e deficit fiscal, gobierno Colombiano na october di 2022 a cuminsa un serie di aumento na e prijs di gasolin, cu na mei 2023 ta suma den seis luna un aumento superior na esun registra den cuater aña pasa.

Mientras algun usuario riba rednan social ta dirigi nan critica riba presidente Gustavo Petro, otronan ta señala cu ta trata di un maniobra pa cubri un debe cu su antecesor Ivan Duque a laga atras. En realidad, e debe pa luna ta sigui causa un diferencia entre e prijs internacional di combustibel y su balor na Colombia, segun expertonan a indica na AFP.

“E traicion di Petro pa trahadonan despues di 1 di mei ta e aumento di 600 peso na e galon di gasolin,” ta un di e mensahenan comparti riba Twitter.

Petro a asumi presidencia Colombiano dia 7 di augustus di aña pasa y na october a cuminsa cu un serie di aumento na e balor di gasolin, cu e obhetivo di reduci un deficit fiscal causa pa e Fondo di Stabilisacion di Prijsnan di Combustibel (FEPC), cu ta subsidia e prijs di productonan deriva for di petroleo for di 2007.

Na mei 2023, e balor promedio di un galon di gasolin a yega na 11.767 peso (2.5 dollar na e momentonan aki), acumulando un aumento di 2.857 peso (1.8 dollar) desde cu e subida di prijs a cuminsa.

Ainda cu esaki, e combustibel na e pais sur Americano ta un di e mas accesibel den region, segun e portal di noticia Global Petrol Prices ta indica.

FEPC crea na 2007 como un mecanismo pa disminui na Colombia e impacto di e instabilidad di prijs internacional di petroleo, ta spaar ora esakinan tabata bao e balor interno y subsidiando den caso contrario.

Sinembargo, for di 2020 e fondo semper a presenta deficit y gobiernonan mester a destina fondonan pa alivia esey, segun cifranan publica den balans financiero oficial. Por ehemplo, na 2019 cu Ivan Duque como presidente na e momento ey, a ordena paga un cuenta di 17 biyon peso (5.160 miyon dollar den tempo ey) e cual tabata un debe acumula for di 2011 a traves di e Ley 1955.

For di 2021, e crudo a recupera den mercadonan internacional y bolbe laga e saldo negativo den FEPC, cu a representa un gasto fiscal di 3.64 biyon peso (4.033 miyon dollar) na 2022, segun un rapport di Ministerio di Hacienda a calcula na december di aña pasa.

Sinembargo, e aumentonan di Petro no ta tuma luga solamente pa cubri e debe restante cu Duque a laga atras, sino pa reduci e buraco cu e prijs internacional, cu ta sigui afecta e parti fiscal na 2023.