Cuminda a bira mas caro na februari, asina por lesa den e ultimo cifranan publica pa Oficina Central di Estadistica (CBS). Remarcabel ta cu e indice di fruta a subi cu 27,5%.

 CBS ta midi tur luna e cambionan (subi of baha) den prijsnan di productonan y servicionan di consumo.

E indice di prijsnan di consumo esta, CPI pa luna di februari  ta 118.79. Esaki ta un subida di 0.8% compara cu e indice di januari (117.89) y acumulando un subida di 1.0% te cu na februari di e aña aki.

E cambio di e CPI pa e ultimo diesdos (12) lunanan (februari 2017 te cu februari 2018) ta 1.9%, un subida di 2.2 ppt compara cu e periodo corespondiente di aña pasa (-0.3%).

E promedio anual di e tasa di inflacion pa e periodo di februari 2017 te cu februari 2018 ta -0.2%, un subida di 0.6 ppt compara cu e -0.8% registra den e periodo di februari 2016 te cu februari 2017.

Analisando e cifranan a ripara cu den e sector di cuminda y bebida no-alcoholico, e prijsnan di cuminda a subi cu 4%. E indice di cuminda & servicio di catering” a registra un subida di 2.7% na februari, despues di un subida di 0.9% na januari 2018. E indice di cuminda na cas (3.5%) a registra un subida, unda ocho (8) di e diesun (11) indicenan di e gruponan di cuminda na cas a subi na februari 2018. Anto manera indica e indice di fruta a conoce e subida di mas grandi (27.5%) na februari. E indicenan di pisca y otro cuminda di lama (1.6%), lechi, keshi y webo”(1.5%) y azeta y otro productonan traha di vet (1.2%) tambe a registra subidanan. E indicenan di berdura (-2.4%) y pan y otro productonan di grano (-0.1%) a baha den prijs.

Suma minimo pa biba
CBS tambe ta duna cifra di e suma minimo cu hogar mester pa biba. Esaki ta yama ‘bestaansminimum’. E sumi minimo pa un hogar consistiendo di dos (2) adulto y dos (2) mucha (edad 0-14 aña) na februari 2018 ta 4422 florin. Esaki ta un subida compara cu januari unda e suma minimo tabata 4357florin. Pa un hogar di un (1) adulto e suma ta 2106 florin, cual tamba a subi compara cu januari unda e suma necesario tabata 2075 florin.

Petroleo menos caro
Prijs di utilidad (electricidad y awa), gasolin y diesel ta wordo determina primordialmente pa motibo di e prijs internacional di petroleo. Na februari 2018 e prijs promedio pa bari di petroleo (US$ 62.59) a conoce un caida di US$ 0.79 (-1.2%) compara cu januari 2018 (US$ 63.38).

Utilidad, gasolin y diesel como grupo, tawata tin un subida di prijs di 1.3% compara cu januari 2018 y hunto a influencia e CPI cu 0.23 ppt, mientras cu e resto di e 448 bienes y servicio hunto a experencia un subida di prijs di 0.7% y tawata tin un efecto di 0.54 ppt riba e CPI.