(ElComercio) – Prijs di dollar na Colombia a marca un record nobo dia 19 di october ultimo, asina e refleha e cotisacion di mercado interbancario di e pais Andino diahuebs ultimo. E jornada a cuminsa cu un prijs maximo di 4.843 peso yegando na 4.908 peso.
E tasa representativo di mercado vigente den e jornada di dia 20 di october ultimo tabata esun di mas halto cu a wordo registra den historia. E balor aki a sigui subi oranan despues yegando na 4.881,76 peso. Te diahuebs den oranan di mainta e prijs maximo a yega na 4.908,50 peso.
E comportacion di e dollar ta mantene marcando recordnan historico na Colombia, menos di un siman pasa tabata supera e barera di 4.700 peso, logrando un marca nobo.
Den transcurso di e aña aki, e peso Colombiano a wordo devalua den 21% compara cu e dollar Americano, un perdida di balor cerca di 834 peso.
Pa purba di manda un mensahe di trankilidad na e mercado pa aumento di prijs di dollar den e siman aki, Jose Antonio Ocampo minister di Hacienda, diamars 18 di october a señala cu e pais lo tin un politica macro economico responsabel.
Entre e medidanan cu el a anuncia, el a sigura cu “nos lo cumpli cu e Regla Fiscal, no lo tin control di cambio, nos ta bay diversifica exportacionnan”, ademas, el a agrega cu pa loke ta trata exploracion di petroleo y gas te ainda nan ta haciendo e tareanan pa establece kico tin mester pa garantisa cu e pais lo tin un volumen di exportacion, y tambe, un bon capacidad pa soporta un balans di cambionan solido.
