Diputado di finanzas y asuntonan economico Hennyson Thielman a biaha hunto cu e delegacion di diputadonan cu a biaha pa Hulanda. Su meta principal tabata pa atende e situacion di crisis mundial y e prijsnan cu a subi drasticamente na Boneiro.
A duna un splicacion amplio di kico tur ta biba na Boneiro y kico ta loke ta impacta Boneiro mas tanto compara cu na Hulanda. Diputado Hennyson Thielman a informa Hulanda pa asina nan ta consciente di e situacion di Boneiro y pa asina mira kico por haci pa Boneiro.
Algun topico cu a papia riba dje durante di e bishita na Hulanda ta e parti di energia unda cu na Boneiro tin un subida di prijs di coriente cu ta un situacion cu no por haci mucho cu ne mirando cu e subida ta door di diferente factor y un di nan ta e subida di prijs di petroleo mundialmente.
Boneiro mes tin basta tempo caba den combersacion cu ministerionan di asuntonan economico di Hulanda pa papia riba un proyecto WEB pa e produccion di energia duradero. Tambe a sinta cu minister di clima di Hulanda y e mandatario a indica cu nan lo bay pone fondonan disponibel pa e proyecto den un forma di un subsidio. E parti aki ta den un fase final y sigur e ta algo hopi positivo pa por caba cu e proceso pa asina Boneiro por haya e subsidio pa por logra haci e proyecto aki.
Tambe na Hulanda a bin riba mesa e fondonan cu tin disponibel pa empresarionan local. Actualmente tin diferente fondonan cu ta disponibel cu ta subsidionan cu ta conta riba nos isla pero na momento ta mira cuanto hende ta haci uzo di nan ta masha tiki mes. Aki ta caminda gobierno di Boneiro tin un responsabilidad cu ministerionan pa percura pa no dies pone algo disponibel, pero percura den realidad tambe e traha.
Tur e puntonan aki a keda treci padilanti y cu Boneiro kier pa e fondonan ta disponibel y cu e empresarionan sa mas di nan y con nan por yega na dje. Tanto empresarionan local y di Hulanda por haci uzo di e fondonan aki y cu e comunidad boneriano por yega na nan di un manera mas facil cu e ta actualmente. Hulanda a mustra interes pa traha riba esaki y na final e meta ta pa e empresarionan local por haya fondonan pa nan por sigui inverti pa por keda competi riba e mercado mundial cu nan tin cu competi riba dje.
