Prijs global di azeta a aumenta cu mas di 14% ayera, despues cu un atake den weekend riba facilidadnan clave pa azeta na Saudi Arabia a causa e pio interupcion riba suministro mundial den record.
Tabata un aumento igual na e Guera di Golfo na 1991, y analistanan a bisa cu tension eleva den Medio Oriente por tene prijs aumenta pa futuro cercano. E efecto economico amplio lo depende riba con largo e interupcion na suministro Saudi lo dura.
Prijs di crudo Mericano a aumenta mas di $8 pa cera na $62.90 pa bari, y Brent a aumenta casi $9 pa bari, alcansando $69.02.
E atake riba e planta di procesamento di azeta mas grandi di Saudi Arabi a afecta mas di mita di su exportacion diario, deteniendo 4% di produccion mundial di crudo.
Esaki a yega despues di un cantidad di otro atake den Golfo Persa, cual a menasa suministro global di azeta y a eleva tension den e region. Pero e alcance di e incidente mas recien tabata mas severo. Esey ta specialmente preocupante pa Asia, unda China, Hapon, Sur Korea y India ta consumidonan mayor di azeta Saudi.
“Locual a afecta ta hopi importante y serio, y esaki no ta bay ta un cos di ‘nos ta drech’e den dos dia’”, segun Amy Myers Jaffe, senior fellow na Council for Foreign Relations. “Ta e diferencia entre hinca bo den pia of schouder, versus hinca bo den nek.”
Siguiente, AP ta splica e impacto amplio di e atake riba economia global.
Dependencia di Asia y Merca riba azeta di Medio Oriente.
Asia ta e consumido principal di azeta di Golfo Persa, absorbiendo 3/4 di e azeta cu a sali di e region aña pasa. Saudi Arabia ta provee como 1/5 di importe di crudo na China, mas di 37% na Hapon y casi 1/3 na Sur Korea.
Y mientras produccion di azeta na Merca ta ‘booming’, no ta suficiente pa reemplasa locual potencialmente por bay perdi si tin mas interupcion den Medio Oriente. Tampoco ta e tipo di crudo cu tur hende kier. Mayoria di e crudo nobo produci na Merca ta ‘light and sweet’. Pero mayoria di refineria rond Costa di Golfo Mericano ta diseña pa procesa crudo pisa, pues ta importa algo di esaki for di Saudi Arabia mientras ta manda algo di su propio crudo na Europa.
Merca ainda ta importa un cantidad grandi di azeta, y na 2018 a trece 2.34 miyon bari di azeta pa dia, representando 11% di e petroleo consumi den e pais.
Prijs halto di azeta ta impacta economia global.
E aumento di prijs ta yega na un momento di riesgo pa economia Mericano. Negoshinan ya caba a reduci nan inversion mientras e guera comercial entre Merca y China a aumenta costo y insiguridad, y e economia global lento a corta den exportacion Mericano.
Prijs halto di azeta, cual tipicamente ta aumenta costo di gasolin, ta disminui poder di gasto di Mericanonan. Esey tambe lo por afecta crecemento na un momento den cual a baha cantidad di contratacion y consumidonan por enfrenta prijsnan mas halto di tarifanan nobo riba importacion Chines.
Segun Beth Ann Bovino, US chief economist na S&P Global Ratings: “Un di e factornan mas grandi afectando nos futuro economico ta incertidumbre. Prijs halto di azeta por ta un factor mas den e final di expansion Mericano.”
Sinembargo, mayoria di economista ta premira e impacto directo riba Merca y otro economianan avansa probablemente lo ta chikito, particularmente si drecha e daño rapidamente. Y na Merca, awo e productor mas grandi di azeta den mundo, prijs mas halto lo por bin cu un beneficio: cu mas ganashi, companianan petrolero por contrata mas trahado, construi mas planta, y expande produccion.
Dolor pa aerolinea.
Aerolineanan ta consumidonan grandi di combustibel, y nan accionnan a cay ayera despues di e atake riba facilidadnan di azeta Saudi.
Jet fuel ta e costo variabel di mas grandi pa aerolinea – contando pa mas di 1/5 di costo operacional – y segundo unicamente na labor entre tur gasto. Aerolineanan ta contraresta aumento den prijs di fuel door di hisa prijs di pasashi, pero esey ta dura un tempo.
“E aerolineanan no lo por rapidamente absorbe e aumento den prijs di azeta”, segun analista di Cowen airlines, Helane Becker.
Uzo di reserva.
Ora un interupcion mayor na suministro di azeta tuma luga, paisnan por actua hunto – coordinando a traves di e Agencia Internacional di Energia – of nan so ora di considera uza azeta for di nan reserva strategico.
Den pasado, tin tres biaha cu paisnan a actua hunto pa uza azeta di nan reserva, incluyendo prome cu e Guera di Golfo na 1991; despues cu horcan Katrina y Rita a daña infrastructura di azeta na 2005; y despues di un interupcion prolonga di suministro di azeta di Libia na 2011.
Contestando tocante prijs di azeta ayera, presidente Donald Trump a bisa: “Well, prijs no a aumenta mucho. Y nos tin reserva strategico di azeta, cual ta enorme, y nos por uza un tiki di esey.”
