Niun hende no ta bai paga niun cen extra pa awa di bebe debi na e ordenansa di cobransa di awa di beerput 2021. Asina diputado Nina den Heyer a declara den Conseho Insular.

Historia.
 Na aña 2010 gobierno di Boneiro a bay di acuerdo cu e construccion di e planta di kloaka. Pa esaki nos a haña subsidio di Union Europeo i el a wordo construi dor di Sona. Construccion no a bay manera premira pero danki na WEB e servicio di reciclahe di awa ta existi desde 2014/2015. Ora cualke hende na Boneiro, sea na Rincon of na Tera Cora, pidi un truck di kloaka bin chupa e skeptico tank of beerput, e truck ey ta hiba e awa sushi na e planta di reciclahe. E servicio ey ta funciona bon pa cual motibo pa 5 aña caba e awa sushi aki no ta keda di dump unda cu ta. Locual lo a y ta afecta nos coralnan. A consecuencia, ta mantene e poblacion di pesca mas miho posibel pa nos piscadonan.

Pa e hotelnan of casnan cu ta mas canto di costa y cu no tin sceptic tank, tin un pomp cu ta chupa e awa di riol automaticamente mande pa e planta di reciclahe pa keda recicla. E servicio aki tambe ta draai 5 aña caba. Ta bon pa enfatisa cu ni pa transporte di awa di riol via e infrastructura, ni pa reciclahe di tur hende su awa, te cu awor no mester a paga nada. Pa 5 aña e servicio tabata completamente gratis y ministerionan tabata subsidia e servicio aki sea por completo of parcialmente. Den e acuerdo di 2010, Bonaire a priminti pa entre otro, pasa un ordenansa caminda e ciudadano di Bonaire ta contribui cu un parti di e costonan di e servicio aki via un impuesto. No tur subsidio ta desaparece pero via e verordening/impuesto aki lo mester contribui (40%) cu e costo nan.

KE a aktua responsabel pa saka lo miho for di e deal existente

E deadline pa introduccion di e impuesto a yega. Colegio Ehecutivo tin cu cumpli cu promesanan haci den pasado. A traha duro pa tin lo mas posibel en cambio di esaki. Por ehempel

  1. a bini contribucion financiero pa caba e proyecto y e gran parti di esey a bolbe bini for di Hulanda. WEB ta trahando riba e partinan aki manera nos por wak na caminda di Belnem pero tambe pronto direccion di Hato.
  2. Tambe nos a papia riba explotacion y subsidio di e planta di kloaka ya cu ministerionan a cuminsa baha nan contribucion. Hincando WEB den un situacion cu mester subsidia esey for di fondonan di awa y coriente …. di mes esey NO POR. E ta trece WEB tambe den un situacion di default pa cu su responsabilidad nan financiero. BC a negosha cu Hulanda pa mantene un minimo di subsidio di Euro 1 miyon pa aña.
  3. Pero tambe pa yuda den e prome 4 añanan extra pa trece e sistema na un miho nivel pa por sigui continua cu e servicio na un manera responsabel.

Cu otro palabra, no ta introduci impuesto sin cu e pueblo ta garantisa di haña algo bek. Ademas e pueblo no ta paga pa e explotacion completo y e subsidio ta sigui bini.

Nos ta papiando di un subsidio di un total di USD 10.5 miyon den añanan te cu 2026. En cambio di esey mester cumpli cu palabracion di 2010 pa introduci e verordening pa e resto dje suma … si no e subsidio ta disparce.

Introduccion dje impuesto y impacto real

Niun hende, i ami sigur, no ke extra impuesto. Pero cumpliendo cu deber i BC nos mester a delibera tocante e manera pa introduci e verordening, nos ta tin algun opcion. Den esey BC su focus tabata pa introduci un manera pa e persona cu e potmoni mas chiki ta wordo influencia menos of no ta wordo influencia at all. Pa esey varios cos a wordo haci. Permiti mi splica.

E prome cos ta con pa introduci e 40% di e costo nan den comunidad. Awor BC ta tin tres opcion:
– Nos ta dividi e costo nan riba tur cas. Pero di mes esaki no ta husto paso tin caminda (manera hotelnan) cu ta produci mas awa di kloaka y ta uza mas di e sistema di reciclahe. En cambio den un caso asina e cas chikito cu ta uza menos ta haña un impuesto impagabel.

– Un di dos opcion lo tabata pa haci un division pa sector. Esaki ta zona bunita pero no por ehecuta. Por ehempel e no ta cay bon cerca e ‘bed and breakfast’ y apartamentonan chiki. Ademas e costo nan di administracion di esaki lo bini acerca y haci hinter e impuesto mas caro. No ta un cos cu por a ehecuta facil.

E di tres opcion ta e principio di ’de vervuiler betaalt.’ E idea ta cu un hotel ta produci mas awa sushi y lo mester paga mas na e servicio cu un famia cu ta uza awa na un manera eficiente. Mas uzo bo uza mas impuesto bo ta paga. Niun sistema no ta perfecto pero e reparticion cu ta aproxima esaki di mas honesto ta e uzo di awa.

Conclusion: No ta e awa ta bira mas caro. E cuenta di awa ta keda mesun cos. Ta uza e cuenta di awa pa un reparticion di gasto na un manera husto. Esun cu ta uza mas, manera e hotelnan, ta paga mas.

E impacto lo ta:

66% di nos poblacion ta uza menos pues e impacto lo ta menos tambe.

Pa locual ta e tarifa fiho pa esunnan cu ta conecta na e infrastructura di riol (por ehempel un apartamento na Boulevard), ta solamente hustu pa nan paga nan parti pa un servicio cu nan ta haci uzo gratis di dje pa 5 aña caba. Si bo ta biba na Republiek, mester paga e truck di Kloaka pa bin haci bo sceptic tank bashi. Esey no mester ora bo ta conecta no ta nada mas cu husto pa nan paga na parti den esaki, cu ta 25 usd pa luna. Mirando cu nan ta paga nan parti pa e infrastructura ku nan so ta usa, por a mantené e impuesto variabel tambe mas abou.
No mester haci manera ta hinter Bonaire ta bay paga esey.

Pakiko nos ta hasi esaki

Laga nos tur corda un biaha mas pakico nos ta haci esaki. Den COVID nos a ripara realmente cuanto impacto turismo tin riba nos economia y tambe entrada di nos hendenan. E turismo di calidad ta balora e coral y pisca fresco cu e por come y ta pesei e ta bini Bonaire. Dor di cuida nos coral y pesca nos ta sigura entrada di cada un persona aki na Bonaire.

E liñanan di irigacion tambe a drecha a base di e palabracionnan cu Hulanda, tin mas miho distribucion di awa y tambe pa LVV. Nos tur ta papia semper di ‘zelfredzaamheid’. Nos por wak LVV awor, ta prome biaha cu esaki ta berdaderamente efectua. Tin awa di irigacion, tin e oportunidad awor pa cumpra berehein, guia bo y concomber chiki na LVV na un prijs di baca flaco. I ademas por expande e actividad eynan dunando cunukeronan un oportunidad real pa haci e negoshi exitoso. Tin mas trayecto cu como BC nos ta traha riba dje pa cu esaki. Tene na cuenta cu nos ta traha cu un vision cu ta sostenibel y no een-dags-vlieg pa popularidad politico den termino corto.

Nos den gobierno mester cumpli cu acuerdonan cu gobierno di Bonaire a cera den pasado. Esey ta continuidad di maneho (continuiteit van bestuur) cu ta parti di un gobierno responsabel. Lo ta bon pa tur hende cu curason pa Bonaire sigui e principio aki.

Nos a purba di wak con por introduci e situacion aki na un manera mas honesto y social posibel. Mientras di esey nos ta purba saca e beneficio pa e mes pueblo aki por tin: Su trabou sostenibel,Su pesca sostenibel,Su agricultura sostenibel,Su salu sostenibel.

Den e verordening tin tambe un ‘flankerend beleid’. Ta algo cu personalmente mi a sigura pa tey den e ‘verordening’. Pa esun cu nos por constata cu e ta echt dificil pa paga, lo tin ‘flankerend beleid’ pa subsidia e costonan. E aña cu ta bini NO tin costo adicional pa NIUN hende. Nos lo sigui fine tune pa e añanan siguiente con pa cobra e impuesto y con pa aplica e yudansa pa esunnan de menos recurso den nos comunidad.