Colombia tabata e pais cu a produci mas benta pa e cadena internacional PriceSmart, conoci tambe na Aruba. Pero no den tur region of pais unda PriceSmart ta presente tur cos a bay bon. Mientras pa ehempel nan benta a crece na Centro America cu un 3.5%; den nos region Caribense nan benta a cay cu un 2.3%
E balans aki a wordo revela pa e central office di PrinceSmart na Merca y publica den e corant Colombiano El Tiempo (9 di januari 2017). Den nan balans nan ta indica cu entre luna di september y november pasa, PriceSmart a bende 82 miyon dollar na Colombia. PriceSmart a bira e prome negoshi di membership shopping lanta na Merca, pero despues nan a realisa un aliansa cu e negoshi Costco cu ta e negoshi mas grandi na Merca.
E cifra aki a nifica un aumento di 22,8% compara cu e mesun periodo di 2015, ora cu nan a bende 66,7 miyon dollar. Ni sikiera e crecemento di e prijs di e productonan importa debi na e devaluacion di e moneda Colombiano no a afecta e ritmo di crecemento di ganashi di PriceSmart na Colombia.
Situacion Aruba
Mientras cu e cadena di negoshi Mericano aki a raporta un decrecimento di 2,3% di nan benta den nos region Caribe. A pesar cu na Aruba e negoshi aki ta uno solido cu a mira aumenta su benta danki na e presencia di Venezolanonan cu ta keda bin nos isla pa haci turismo di abastecemento. Mientras cu PriceSmart cu ta un cadena cu tin su base na Merca, eynan nan tin un tienda so na Virgin Islands. E negoshi aki ta presente den 12 pais entre Sur America, Centro America y Caribe cu 39 tienda total.
