Diaranson mainta parlamento di Aruba tabata den sesion publico pa tratamento di Presupuesto Supletorio Nacional pa aña fiscal 2017. Como representante di interesnan di pueblo, parlamentario pa fraccion di MEP, Daphne Lejuez ta forma parti di e reunion caminda tin e tarea dificil e in desea di bay aproba 130 miyon florin adiciona pa por cubri gastonan pais Aruba.
“Es mas, nos ta papiando di un deficit di 155 miyon florin, pasobra a presupuesta un surplus di 25 miyon florin cu no a logra realisa”, asina parlamentario Lejuez a declara pa cuminsa duna un idea di e situacion alarmante di fianza publico. Varios di ex-miembro di gabinete Mike Eman II tabata na turno uzando palabranan manera budget neutraal, ficticio y ‘artificial, pero na opinion di e parlamentario di MEP: “Al is de leugen nog zo snel, de waarheid achterhaalt haar wel”.
Pues, ni con lihe e mentira ta, e berdad semper lo alcanc’e. Y diaranson tabata e dia di berdad den parlamento y pa pueblo, ora cu mester bay aproba 130 miyon extra pa asina por garantisa e continuacion di gobernacion. Gabinete Mike Eman I y II a hiba un maneho financiero iresponsabel basa, principalmente, riba gastonan structura y entradanan incidental cu ta resulta den un carga cu awe nos pais no por wanta mas.
Pa sra. Lejuez, un presupuesto supletorio mester ta un instrumento cu cual por maneha cambionan chikito y cu regularmente ta bin parlamento, pa asina, e instituto Parlamentario Daphne Lejuez (MEP): ‘Presupuesto supletorio mester ta un herment pa ahusta y control, no ultimo recurso ora baca a hoga’ por haci su trabou di controla.
E no ta un salbabida pa gobierno uza como ultimo recurso, ora cu no tin otro opcion y ta practicamente obliga Parlamento pa bay di acuerdo cu ne. Esaki ta un mal uzo delibera di e sistema; algo cu sigur no por continua. Pa e parlamentario di MEP, e añanan venidero ta bay pidi pa presenta reportahenan financiero cu mayor frecuencia, pa asina por cumpli cu e funcion di control cabalmente.“Esaki, na su luga, lo promove transparencia, bon gobernacion y un fianza publico sostenibel” asina sra. Lejuez a finalisa
bisando.
