Ayera mainta na Parlamento di Aruba a tuma luga e tratamento di presupuesto di Dienst Openbare Werken pa aña 2024, na unda a trece dilanti diferente punto como estado di careteranan, privatisacion di RWZI y proyectonan na caminda.

Maske tabata un tratamento di presupuesto unda parlamentarionan tambe por duna nan comentario den un reunion publico, esey no a tuma luga ayera, tabatin como oradornan so e parlamentario di MEP Marcos Berlis y e parlamentario independiente Ryçond Santos Do Nascimento.

E prome persona cu a hiba e palabra tabata Marcos Berlis, ken a haci varios pregunta na prome minister Evelyn Wever-Croes ken tambe ta encarga cu e cartera di Infrastructura.

Den su ponencia, prome minister a splica cu e importancia di e presupuesto aki di aña 2024 ta pa gobierno por finalisa e re-organisacion cu ta tumando luga na e momentonan aki na DOW, tambe pa haci operacion y mantencion di obranan publico cu e meta di minimalisa e kehonan cu por tin den comunidad y entre otro, finalisa e digitalisacion di tur e procesonan.

Prome minister a declara cu e necesidad di vivienda ta hopi grandi na Aruba, “ta un reto grandi pa nos gobierno” y cu DOW mes no tin un rol proactivo den esaki, pero su ministerio si, “nos ta deliberando riba kico ta e miho forma pa adresa esaki. Tambe a señala cu proximamente nan lo sinta cu FCCA y minister ta yudando pa inventarisa e necesidad di vivienda na Aruba, nan a haci un analisis di e gap cu tin, kico nos por ofrece y kico falta na unda nan tin cu bin cu un plan ambicioso pa por yega na viviendanan di cada persona.

Den comparacion cu e gastonan di pos di personal den añanan 2022, 2023 y cu na 2024 a baha na 1.2 miyon , prome minister a informa cu esey ta pa motibo cu ta bay privatisa RWZI y nan personal cu ta 16 hende ta bay hunto cu e proyecto aki tambe, debi na esey e gastonan di DOW ta baha, ademas a destaca cu nan ta bezig cu e social plan cu ta necesario pa empleadonan por pasa over.

Berlis a trece dilanti varios preocupacion y solicitud di parti di ciudadanonan na prome minister como por ehemplo, si lo pone un rotonde na un crusada cerca di e mercado Superfood e cual durante cierto orario ta practicamente imposibel pa sali caya principal ora ta saliendo di Superfood. Un otro peticion segun Berlis dirigi na prome minister, ta pa pone verkersplat na Pos Abao 59 na unda cu tin un crèche y hendenan ta core hopi duro na e area ey loke ta representa un peliger.

Pa loke ta trata e dos pregunta aki, un di e caminda cerca Superfood, prome minister a contesta cu eynan ya caba tin dos rotonde, pero si lo evalua e punto aki, pa e di dos pregunta tocante verkersplat na Pos Abao, prome minister a informa cu e evaluacion a ser haci caba, e ta bin na remarca y den e planificacion.

E suma total cu lo inverti den drechamento di careteranan cu ta den mal estado ta un total di 10.4 miyon florin, prome minister a declara cu pa yega na e suma aki den presupuesto tin un pos di 2.6 miyon, den presupuesto di pais Aruba tin 2.8 miyon florin cu a ser aloca pa inversionnan.

Banda di esaki, tin 3 miyon florin pa mantencion di edificionan lo cual ta algo cu pa hopi aña no a tuma luga segun prome minister a sigura pa motibo di reduccion di gastonan.

Mientras tanto, nan ta trahando den e Masterplan pa nan por drecha tur caretera, el a splica cu e plan aki ta reparti riba 17 aña, esey tin di haber cu e capacidad cu por tin no solamente na DOW sino tambe den otro stakeholders pa por drecha tur e caretera na Aruba y aworaki nan ta den e fase di mira e aspectonan financiero pa motibo cu esey ta otro reto.

Na e momentonan aki, avenida Milo Croes di Dakota ta den planificacion cu e prome fase pa por haya asfalt den e luna aki.

El a trece pa dilanti cu DOW tin un maneho cu ta aplica a base di e cual ta tuma decision den tur e necesidadnan cu tin cu ta hopi, pa loke ta trata mantencion di caretera, a base di esey e criterionan cu nan ta mira ta estado di mantencion di e caminda, si ta den hopi mal condicion e ta haya un prioridad, ta mira e funcion di e caretera den e network y con importante e ta, uso y intensidad di e caminda y si e bario tin hopi tempo caba.

Drechamento di riolering y caminda na highrise hotel, ta un proyecto proyecto cu nan a anuncia algun luna pasa, pero mirando cu e caretera dilanti aki mester keda habri, prome minister a comenta cu ya caba a aloca fondonan pa e prome fase cu ta bay cuminsa na april di e aña aki, a presenta un tardansa door di un tuberia cu mester a regla. E prome fase aki ta cuminsa na The Mill te South Beach, e di dos fase ta bay for di South Beach te Holiday Inn y fase tres cu ta pa otro aña ta trata di embeyecemento, aceranan, parkerplats, entre otro.

“E reto pa tur esaki ta pa tin tur e hotel operacional y accesibel y den esey DOW ta den combersacion conhunto cu AHATA y hotel caminda por tin un miho planificacion posibel,” segun prome minister a sigura.

A trece dilanti un mocion di partidonan MEP y Raiz na final di e tratamento di presupuesto unda a pidi na Gobierno di Aruba pa pinta e liña memey di caminda conforme ley pa crea posibilidad pa automobilistanan bay ambos banda y asina e por yuda e fluho di trafico entre Parlamento y Royal Plaza. E mocion aki a ser aproba cu 11 voto aproba y 5 contra.