Presupuesto di Contraloria General y Parlamento 2016 a keda aproba

Diamars den comision central di Parlamento a tuma luga e tratamento di e presupuesto di Contraloria General(Algemene Rekenkamer Aruba) y di Parlamento mes. Otro presupuesto cu tabata pendiente pa trata den e reunion aki tabata esun di Raad van Advies (RvA), pero ainda gobierno no a entrega e presupuesto aki pa wordo trata debidamente.

Pa  loke ta trata presupuesto di Parlamento mes esaki a wordo trata den un ambiente mas pisa cu esun di Contraloria General.  Durante su debate den e prome ronda Parlamentarionan a bin dilanti cu diferente preocupacion. E comision interno di Parlamento encarga cu tratamento di e presupuestonan aki tabata presidi pa Presidente di Parlamento mes y tambe cada lider di fraccion. Den e caso aki lider di fraccion di AVP, sr. Rene Herdé y lider di Democracia Real, sr. Andin Bikker, mientras cu lider di fraccion di MEP, sra. Evelyn Wever-Croes a abstene di participa den e comision aki.

Presupuesto Parlamento
En bista cu e mesun presidente di Parlamento drs. Marisol Lopez-Tromp mester defende su propio presupuesto, e ora ey vice-Presidente di Parlamento, sr. Chris Dammers tabata encarga di atende cu e tratamento di e leynan presupuestario aki. Sr. Dammers a declara na Bon Dia Aruba cu tur dos presupuesto cu a keda aproba diamars. Esun di presupuesto di Parlamento,  fraccion d AVP y di DR a vota pro, mientras miembronan di fraccion di MEP a vota contra.
Vice presidente di Parlamento a declara na Bon Dia Aruba cu mesun cos cu otro departamento di Gobierno, tambe Parlamento y Contraloria General ta percura pa nan presupuesto keda balansa cu otro añanan anterior. E presupuesto di Contraloria General ta un suma alrededor di 2 miyon 600 mil florin; y esun di Parlamento ta alrededor di 12 miyon 600 mil florin pa atende cu e salario di e 21 miembro di Parlamento  y demas empleadonan di e organo legislativo aki.
“Esaki ta e presupuesto cu pa basta aña nos ta bin manehando”, asina sr. Dammers a declaracion.

Presupuesto Contraloria General
Sr. Dammers a bisa cu nan a pasa riba e presupuesto di Contraloria General y nan a aprob’e caba prome cu merdia ayera. El a destaca e bon trabou cu e instancia aki ta bin haciendo durante tur e añanan pa loke ta e diferente cuenta anual cu ta un exigencia pa ley cu mester cumpli cun’e  ya cu di e forma aki nan por tin cifra pa verifica ora cu nan ta bay trata un siguiente presupuesto. Tambe Contraloria General ta encarga di realisa diferente investigacion riba otro materia relaciona cu aspecto economico, y nan ta yuda Parlamento hopi bon cu esaki.

E cuenta anual di 2014 ta entrega na Parlamento y nan ta wardando contesta riba e preguntanan cu nan a manda na Gobierno.  
“Aworaki si e ta mustra cu pais Aruba ta completamente  up to date cu tur nan cuentanan anual, y ya caba nan tin e presupuesto 2015 aproba wardando pa esun di 2016”, el a bisa.