Desde mei e aña aki, varios reunion interno a wordo teni, cu e ekipo di A.T.A. local como tambe internacional. Tambe a sostene reunionnan unda a papia di proyeccionnan y plannan pa 2020 cu socionan di turismo, cu Hunta di Supervision di A.T.A., como tambe di AHATA entre otro. Topiconan discuti ta den cuadro di maneho di turismo nacional delinea pa Minister di Turismo y su ekipo.
Esaki a conduci na entrega formal di e plan y presupuesto pa 2020 na Hunta di Supervision di A.T.A. riba 30 di augustus 2019, y consecuentemente na Minister di Turismo riba 25 di september 2019. Tabata un placer pa presenta e documento aki na Minister di Turismo, Danguillaume Oduber, diaranson ultimo, 23 di october 2019.
Odubera expresa su gratitud pa cu e logronan proyecta pa 2019, y pa cu e strategia y empuhe continuo di parti di A.T.A. pa 2020. E hecho cu turismo a duna resultadonan record ultimo añanan y ta proyecta di cera 2019 na un manera fuerte atrobe a yuda nos pais enormemente. Oduber ta satisfecho cu e meta di sigui aumenta entrada pa pais Aruba na 2020, y cu esaki sigui enfoca riba e balor cu nos ta ricibi pa medio di turismo. Esaki lo bay man den man cu atraccion di e bishitante cu por laga mas atras den nos economia y cu esaki ta cumpli cu un di e visionnan principal di Ministerio di Turismo.
Ronella Tjin Asjoe-Croes, CEO di Aruba Tourism Authority, a indica di ta satisfecho cu pa di 9 aña consecutivo a entrega e presupuesto conforme loke ley ta prescribi pa A.T.A., esta prome cu september 1. E proceso pa entrega e presupuesto ta tuma hopi luna di preparacion pa asina evalua y determina kico ta e miho strategia pa e aña cu ta sigui –esaki mas cu claro ta cuadra den e malchi mas amplio di e plan strategico pa Aruba su turismo tambe, conforme maneho nacional y conforme ‘Business Plan’ di A.T.A.
E aña aki tabata uno bon pa loke ta Aruba su turismo. Mas cu claro semper tin aspecto pa mehora y cosnan cu por haci miho, y esaki ta aplicabel no solamente pa A.T.A. pero pa un y tur cu ta traha den turismo. E puntonan cu mehoracion y di cambio tur ta inclui den e plan pa 2020, tambe e aspectonan cu lo mantene y cu ta dunando bon resultado. E demanda pa Aruba a sigui di ta fuerte, e plan presenta mester yuda nos combati e competencia sumamente fuerte eyfonan.
Proyeccionnan 2020.
Pa loke ta e 4 indicadornan principal nacional; pa 2020 a inclui como meta un crecemento 2.2% den ‘stay-over arrivals’ (turistanan di estadia) y un crecemento di entre 2% y 3% den Tourism Credits. Pa cu resultado di RevPar, esaki ta proyecta pa crece entre 2% pa 3%. E meta di turismo crucero ta pa consolida y pues mantene e resultado di e aña aki.
Proyectonan.
Tin cu menciona cu un di e prioridadnan den e corporate plan di A.T.A. 2020 ta upgrading di pais Aruba. Conforme maneho di Minister di Turismo cu ta kere den calidad di turismo, busca e turista afluente, Aruba mester un producto pa di e forma aki e turista haya balor pa su placa. Den aña 2020 lo bay target e turista cu tin un entrada anual di US$ 200.000. Esaki ta prome biaha ta enfoca riba e turista cu entrada anual aki. Lo bay inverti den e proyecto di Baby Beach fase 2 y tambe Bushiri Beach fase 2. Lo bin cu un mountain bike trail cu sigur ta algo nobo y trending. Lo enfoca riba mercadonan niche manera diving, kitesurfing y piscamento y tambe un programa cu enfasis riba esakinan.
Averahe di Crecemento Anual 2011-2018.
Desde di introduccion di A.T.A. Sui Generis na 2011, metanan a base di e 4 indicadornan principal a ser cumpli. Por nota e averahe di crecemento anual pa cada un di e indicadornan pa cu e periodo di 2011 pa 2018: Stay-Over Arrivals: +4%, Tourism Receipts: +5%, RevPar: +7%, Cruise Arrivals: +5%.
Presupuesto 2020.
Conforme presupuesto presenta pa 2020, A.T.A. su entrada operacional (revenues) lo ser uza primordialmente pa mercadeo internacional y parti di esaki pa mehoracion di nos producto turistico.
Ronella Tjin Asjoe-Croes ta gradici y felicita e ekipo completo di A.T.A. cu a traha duro pa asina percura un biaha mas pa Aruba Tourism Authority por entrega un documento completo y bon balansa.
Presente pa esaki tabata: Minister di Turismo Danguillaume Oduber, Consehero General di Minister di Turismo Gerald Tsu, Consehero di Turismo di Minister di Turismo Sharlyze Romano, miembro di Hunta di Supervision di A.T.A. Cisco Quant, Janien Huistra, Maarten Jan van Romondt y Lisette Malmberg. CEO di A.T.A. Ronella Tjin Asjoe-Croes, CMO Sanju Luidens-Daryanani, CFO Maas van Drie y Dyane Vis-Escalona, Business Manager di A.T.A.
