Durante un rueda di prensa riba veld di e compleho deportivo Guillermo Prospero Trinidad na Dakota, Minister Dangui Oduber, hunto cu e presidente nobo di AVB (Arubaanse Vietbal Bond) señor Randolf Lacle, a anuncia e proyecto di renobacion di e stadion aki cu lo cuminsa e aña ki mes.
Durante e aprobacion di presupuesto di Aruba pa aña 2021, a aproba un suma di 1.5 miyon florin pa cuminsa cu e renobacion di e veld di futbol di e stadion aki. Minister Oduber ta splica cu pa varios aña caba e compleho deportivo aki no a conoce un renobacion y pa es motibo e seleccion nacional di Aruba no por hunga weganan internacional riba e veld aki pasobra e veld a wordo afgekeurd pa Fifa y Concacaf.
“Nos ta sumamente contento cu awe nos por anuncia, conhuntamente cu e presidente di Arubaanse Voetbal Bond (AVB), cu nos ta bay renoba henter e compleho deportivo di Guillermo Prospero Trinidad”, Min. Oduber a bisa. “For di momento cu nos a drenta gobierno nos maneho tabata dirigi pa inverti den infrastructura, mehora infrastructura di facilidadnan, percura pa veldnan tin artificial turf, bon iluminacion, bon tribuna, bon kleedkamers, percura pa un upgrade di e facilidadnan pa asina nos motiva nos muchanan y hobennan, stimula nan pa participa mas activamente den deporte”.
E presupuesto di 1.5 miyon florin no lo ta suficiente pa renoba e compleho deportivo den su totalidad pa otro aña maart, cu Min. Oduber y Sr. Lacle ta premira cu lo ta e prome wega internacional na Aruba, pero e presupuesto aki ta solamente pa cuminsa cu e fase uno di e proceso di renobacion completo.
“Manera nos tur sa e veld aki mester artificial turf nobo, e tribunanan tambe mester haya un mehoracion, nan practicamente a wordo afgekeurd tambe. Nos mester kleedkamers nobo, nos mester miho iluminacion y tambe e atletiekband mester cambia. Naturalmente esaki ta un master plan cu nos lo tin deseo di mira ehecuta y e 1.5 miyon florin no ta yega pa cubri henter e inversion di henter e facilidad, pero esaki ta e comienso di e master plan”, Min. Oduber ta splica.
“E compromiso ta cu aki dos pa tres aña nos tin un compleho deportivo completamente renoba. Nos ta bay cuminsa cu e artificial turf, e kleedkamers y e tribuna, y despues nos lo sigui cu e atletiekband y tambe e iluminacion, pa di e forma aki nos tin un compleho deportivo cu ta na e standard di Fifa y Concacaf pa asina seleccion di Aruba por hunga weganan internacional na Aruba mes”, el a agrega.
Presidente nobo di AVB, Randolf Lacle,a bisa cu personalmente e semper tabata sinti hopi fastioso cu fanaticada di Aruba no por a presencia weganan di e seleccion pa e ultimo seis añanan. “Mi ta kere sigur mi tabata sinti un berguensa, pero nos ta traha duro pa yega na e solucion di esey. Mi ta hopi contento cu e aprobacion di gobierno pa pone e 1.5 miyon disponibel, locual lo mehora e stadion aki enormemente y cu nos por cumpli cu e standard pa weganan internacional”.
“Manera mi a bisa den mi presentacion, semper pa mi e infrastructura di futbol den su totalidad ta importante, nos no mester descarta e importancia di un bon infrastructura di deporte, sigur no pa futbol. Nos tin diferente combersacionnan andando caba cu Fifa riba e area ey, riba kico nos por haci pa asina yuda locual ta facilidadnan deportivo, specialmente pa futbol”, Sr. Lacle a agrega.
Pa hopi aña caba tabatin e promesa pa mehora e infrastructura di e facilidadnan deportivo, y segun Min. Oduber ta splica, for di momento cu nan a drenta gobierno, e intencion tabata pa haci esaki prome, pero no tabatin e espacio financiero, pero e aña aki si gobierno a mira e necesidad pa haci e renobacion aki posibel.
“Mi ta kere tur mi coleganan minister a mira e importancia den inverti den e facilidadnan cu a wordo afgekeurd door di Concacaf y Fifa cu nos no por hunga weganan internacional na Aruba mes. Mi ta contento cu tur mi coleganan a mira e importancia y a bay di acuerdo pa pone e 1.5 miyon florin disponibel den e presupuesto di aña 2021”, Min. Oduber a bisa.
Den otro palabranan Fundacion Lotto pa Deporte no a aporta loke e mester a aporta na deporte di Aruba y Min. Oduber ta splica e situacion cu Fundacion Lotto pa Deporte tambe.
“Loke nos a lamenta semper ta cu fundacion Lotto pa Deporte ta genera miyones di florin pa medio di benta di lotto. Den un bon aña nan ta genera entre 50 cu 60 miyon florin pa aña, y nan tin un acuerdo cu Stichting Sport Subsidie, cu sea e benta ta bon of e benta ta malo, nan ta traspasa 4 miyon florin pa Stichting Sport Subsidie, cu consecuentemente ta reparti e fondonan aki bao di e diferente federacionnan na Aruba”, e ta splica.
“Semper nos meta tabata pa convence nan pa re-negocia e contract pa di e forma aki, mirando cuanto fondo ta wordo genera pa medio di benta di lotto, inverti den mehoracion di facilidadnan pasobrasin un bon facilidad bo no ta haya e motivacion di e muchanan y hobennan pa practica deporte. Bo ta mira cu durante añanan fondonan no a wordo poni disponibel pa mantencion di e facilidadnan, pesey nos a hiba un bataya cu nan desde e prome dia di gobernacion”. Min. Oduber a agrega
Min. Oduber ta splica tambe cu den e siguiente termino di gobernacion, finalmente gobierno lo bay haya un tiki mas autoridad den Fundacion Lotto pa Deporte pa di e forma aki convence Canadian Loan Bank pa mas fondo pa deporte
“No por ta cu bo ta bende 60 miyon florin na lotto anto deporte ta haya solamente 4 miyon, anto e Canades cu ta maneha Lotto ta keda cu entre 10 y 12 miyon florin na ganashi, e no ta un reparticion husto y nos ta spera cu nan tin e boluntad pa mira e necesidad pa inverti mas den deporte, inverti den mehoracion di infrastructura pa di e forma aki mas y mas mucha participa na deporte”, el a bisa.
