Raad van Advies ta cuestiona con Gobierno a crea servicionan nobo cu ta nifica mas fragmentacion y gasto

Cifranan di e cuadro financiero multianual ta mustra cu debe di Gobierno lo sigui aumenta, ademas cu e proposicion di Presupuesto 2022 presenta na Parlamento no ta ilustra exactamente con ta tene cuenta cu e landspakket pa Aruba. Asina Raad van Advies ta bisa den su conseho.

Aruba ta recuperando di e consecuencianan socioeconomico a pesar di e pandemia di COVID-19 cu ainda no ta tras di lomba. Turismo a cuminza recupera y Banco Central ta entre e instancianan cu a duna su proyeccion di crecemento. Hasta e crecemento den un scenario pesimista ta 6.8 porciento. Mester bisa si cu e scenario aki tabata concipia prome cu e ola di Omicron (red. y e guera na Ucraina). Como tal Raad van Advies ta bisa cu 2022 lo ta marca pa inseguridad y instabilidad incluso pa motibo di inflacion.

Landspakket

E landspakket, palabra entre Hulanda y Aruba pa sosten di likides mester duna guia na e maneho di Pais Aruba y tambe Presupuesto di Pais Aruba. Den e splicacion di e ley di Presupuesto ta bisa cu mayoria trayecto di e reformanan ta den e fase di investigacion of revision. Pero esey no ta motibo pa no tuma mas iniciativa pa ehecuta e diferente aspectonan di e landspakket y tuma paso concreto riba medidanan cu mester sali di e prioridadnan den maneho acorda. Segun Raad van Advies, unda den splicacion di Ministerionan ta referi na temanan den e landspakket, no ta duna indicacion suficiente cua medidanan specifico tin como maneho y cua ta e pasonan concreto cu ta tuma pa implementa esakinan. Pa motibo cu falta e acoplacion aki entre e maneho di presupuesto y e temanan di e landspakket, ta dificil pa Raad van Advies determina si berdad a usa e landspakket como punto di salida pa Presupuesto 2022.

Den e cuadro aki, Raad van Advies a mustra riba su conseho cu a manda pa e LIM 2022 (Landsverordening Instelling Ministers) unda ya caba a mustra riba un ehecucion desbalansa di e landspakket y unda a puntra pakico no a busca miho acoplacion cu e landspakket na momento cu a organisa e Ministerionan, pa asina tin mas conexion cu e tema y prioridadnan cu ta acorda cu Hulanda.

Aunke tin hopi parti di e landspakket cu ainda ta den un fase di orientacion, toch Gobierno por a anticipa e investigacionnan particularmente den luz di ‘quickwins,’ segun Raad van Advies. No solamente ta trata aki e puntonan di accion for di e landspakket, pero hasta e reformanan necesario cu ta describi den e master plan “Reposicionando nos Belanan’ (Repositioning our sails). Como ehempel, Raad van Advies a conseha hopi biaha pa simplifica e cobranza di number di vehiculo (wegenbelasting) y asina aumenta e cumplimento. Pero tambe por pensa riba e recorte den e lista positivo di remedi of introduccion di e contribucion propio den cuido.

Alabes, Raad van Advies a mustra riba e importancia pa bin cu iniciativanan di maneho cu ainda mester keda prepara, pa asina garantisa e sostenibilidad di fondonan social, ya cu esakinan, den nan forma actual, no ta duradero pa futuro.

Viabilidad di Arubus, Serlimar, y Post Aruba

Un otro punto cu por menciona den e cuadro aki ta e bista critico riba e viabilidad di companianan publico y entidadnan publico cu anualmente ta ricibi contribucion substancial di Gobierno, manera Arubus NV, Serlimar y Post Aruba. Ademas, Raad van Adives ta puntra si, cu bista riba reduccion di gasto, a evalua laga e inversion y operacion di e plantanan di purificacion di awa den man di sector priva pa medio di un procedura di destaho y acuerdo di concesion. Raad van Advies a bisa cu a tuma nota for di medionan di comuniacion cu Gobierno ta considerando e privatisacion di e RWZI.

Banda di tur esaki, Raad van Advies a tuma nota cu pa e aña di servicio 2022 a crea un cantidad di servicio, conseho y organo di conseho nobo. E splicacion pakico mester di e seccionnan nobo no ta suficiente cla. E pakico no a pone e actividadnan bao di entidadnan publico existente no ta suficientemente argumenta, segun Raad van Advies, cu tin miedo cu ta bin mas fragmentacion di actividad y medionan, cu no ta bon pa e gasto y efectividad di sector publico. Consecuentemente, e ta bay contra di e obhetivo di e landspakket, cu ta papia netamente pa reduci gasto y aumenta efectividad den sector publico.

Finanzas Publico

Gobierno a apunta tres indicador di sostenibilidad den e periodo post-COVID, cu ta sector di cuido, economia y finanzas publico. Pa loke ta economia y finanzas publico, e intencion ta pa medio di e landspakket, e masterplan ‘Repositioning our sails’ y e ‘National Strategy Plan’ introduci proyectonan cu mester stimula crecemento economico, kita e peso di mas for di e gasto pa haci negoshi, y maneho pa intensiva entrada. Den e cuadro aki lo tin accion y inversion necesario, a base di tur e revisionnan y investigacionnan cu ta tumando luga awor. E inversionnan y accionnan lo sigui den e di dos parti di 2022. Pero segun Raad van Advies, ta bisa den e splicacion cu ainda no ta cla cuanto ta e sumanan di inversion cu ta rekeri, cu ta nifica cu no por a pone e calculacionnan di e financiamento di e proyectonan aki den presupuesto.

Pa loke ta finanzas publico, den anticipacion di e Rijkswet Aruba financieel toezicht, RAft, ya a tene cuenta cu e normanan proponi, cu ta inclui cu mester bin un surplus di un (1) porciento di e Producto Interno Bruto (GDP) entrante 2023.

Si sali di e expectativanan di Departamento di Asuntonan Economico, DEHZI, e GDP di Aruba na 2024 lo ta mas halto cu esun di 2019, cu ta prome cu COVID. Sinembargo segun Raad van Advies, e cifranan no ta mustra – a pesar di un mehoracion di GPD riba nivel di 2019 – cu finanzas publico lo mehora. E cuadro multianual 2021-2026 ta mustra cu te cu e aña ey, y consecuentemente henter e periodo di e gabinete actual, lo no realisa ningun surplus. Esaki lo tin como consecuencia cu e debe di Gobierno pa motibo di un deficit financiero anual, lo no baha pero netamente lo aumenta tur aña.

Ademas, ta sali di e punto di bista cu a tene cuenta cu e norma di quota di debe di 70 porciento na 2031, manera cu e ta poni den e RAft. Pero Raad van Avies ta puntra, mirando e pronostico te cu 2026, den ki sentido lo considera e 70 porciento uno realistico. Pasobra si mester tuma como punto di salida cu e GDP ta crece cu un (1) porciento despues di 2026, ta nifica cu e GDP na 2031 mester ta 6.962 biyon florin, casi 7 biyon florin. E debe di Gobierno lo mester ta maximalmente 70 porciento di e GDP, cu ta yega na casi 5 biyon, esta 4.873 biyon. Pa yega na e suma y porcentahe aki, Gobierno mester realisa un surplus di 253 miyon tur aña entrante 2026 te cu 2031, cu ta un averahe di 3.7 porciento di e GDP. Raad van Advies no ta considera esaki un cifra realistico. Como tal, Raad van Advies ta conseha Gobierno, basa riba cifranan presenta den e cuadro multianual 2021-2026 pa haci un revision critico y reduci esakinan pa asina por stipula e rumbo corecto pa yega na un reduccion structural di debe di Gobierno, no solamente pa e periodo di gobernacion di e Gabinete actual, pero tambe pa un plan di reforma integral a termino largo.

Potret: (1) Composito di miembronan di Raad van Advies. (2) Momento cu minister di Finanzas a haci entrega di presupuesto 2022.