Cu un sala di parlamento parcialmente bashi asina a cuminsa e tratamento di presupuesto 20202. Algun parlamentarionan a abstene di bay sesion di tratamento di e presupuesto aki, debi cu nan a bay exterior recientemente y nan ta den cuarentena actualmente.
Prome Minister, Evelyn Wever-Croes a habri e sesion aki reflehando riba e situacion y cambio cu coronavirus of Covid-19 a trece cu ne den nos bida y actividad diario. Igualmente riba e presupuesto y nota di cambio haci debi cu e situacion di Covid-19, ta haci cu e presupuesto aki ta uno pa atende cu e crisis aki. Pues gobierno ta presenta un plan di contigencia financiero-economico di un suma di 1.3 biyon florin pa atende cu e emergencia cu e Covid-19 ta ocasiona na Aruba . Nos DGP lo cay cu un 44.4%. Nos a perde 80% di nos entrada cu ta bin for di nos industria turistico. Pais Aruba lo mester presta for di instancia internacional placa y Hulanda ta dispuesto pa yuda den esaki. El a pidi pa parlamento por aproba e presupuesto aki pa asina logra e fiansa aki pa cuminsa ‘reconstrui nos pais’ y asina por brinda asistencia social pa esunnan mas vulnerabel di nos comunidad.
El a duna un relato di e 12 caso positivo di Covid-19, di nan e mas jong tin 22 aña y esun di mas edad tin 64 cu ta e prome caso di e Mericano cu a bay su pais bek caba. Ademas di 833 persona den cuarentena. El a referi na e diferente medidanan adopta pa evita cu e virus aki sigui plama na Aruba.
