Lider di fraccion di MEP, Parlamentario Rocco Tjon a declara na Bon Dia Aruba a bisa na Bon Dia Aruba cu e presentacion cu nan a haya for di Minister Xiomara Ruiz-Maduro, caminda el a presenta e asina yama ‘najaarsnota 2019’ of nota financiero di fin di aña 2019, tabata un encuentro abierto cu Parlamento di Aruba.
E mandatario a duna un splicacion caminda tur norma financiero a wordo logra e aña aki. Banda di esey, e norma poni den e protocol firma cu Hulanda riba gasto di personal di 479 miyon florin tambe a wordo logra. E ta haya cu e disciplina financiero aki a conduci cu diabierna pasa, Aruba no a haya un ‘aanwijzing’ (instruccion di Reino) for di Conseho di Minister di Reino.
“Hulanda tambe ta ripara cu e maneho cu ta wordo hiba dor di gabinete actual y con Sra. Ruiz-Maduro ta ehecuta esaki, ta uno serio y responsabel,” el a bisa. Igualmente e ta lamenta cu lider di partido AVP ta ‘desapunta y hopi rabia’ pasobra pais Aruba no a haya un KB, sin tene cuenta cu e consecuencia di un medida asina ta pa tur e ciudadanonan, y no pa e gabinete actual.
Parlamentario Tjon a bisa cu pais Aruba no por haya un ‘aanwijzing’ sino un KB a base di statuut, ya cu e constelacion di nos estado ta diferente cu Corsou y e otro partnernan den Reino. Pero Aruba como pais autonomo por apela esaki.
E ta haya cu presupuesto 2020 ta crucial den henter e situacion aki. E presupuesto aki mester cumpli cu e palabracionnan. Pasobra pa loke ta e presupuesto 2019, Colegio di Supervision Financiero CAft a indica cu pais Aruba a cumpli cu tur e normanan, segun e Parlamentario.
Igualmente e parlamentario a cualifica como ‘positivo’ e nota cu Minister Ruiz-Maduro a presenta, caminda ora cu gobierno a traha su presupuesto 2019 nan a tene cuenta cu un desaroyo economico di 1%. Awor a resulta cu e desaroyo economico ta bay ta 2.4% pa 2019. Esaki segun cifranan di Banco Central Aruba (BCA), segun Parlamentario Tjon.
