Ayera merdia minister di Finanzas, Asunto Economico y Cultura, Xiomara Maduro a entrega un USB cu forma di un bara di oro na presidente di Parlamento, Ady Thijsen, cu ta contene e presupuesto 2020 pa su tratamento den nos organo legislativo.

Maduro a splica cu nan a entrega e presupuesto e biaha aki di un forma mas innovativo y e forma di bara di oro ta simbolisa e placa di nos pais.

El a pidi dispensa na parlamento pa e tardansa, ya cu segun nos constitucion, entrega mester a tuma luga dia 1 di september. Sinembargo hopi esfuerso a wordo inverti pa elabora e presupuesto aki, considerando e reto financiero di nos pais, ya cu no solamente e mester ta uno balansa, sino cu e mester produci un surplus.

E mandatario a bisa cu despues di 10 aña, pais Aruba tin un presupuesto cu un surplus financiero di 46 miyon, cual ta 0.8% di nos GDP. Pero banda di esaki pais Aruba tin un necesidad financiero di 315 miyon florin. El a splica cu tur aña tin cierto debenan cu pais Aruba tin cu cumpli cu ne. Kiermen -segun e minister- cu gobierno no ta creando debe nobo, ya cu no tin un deficit sino un surplus. “Y p’esey e necesidad financiero ta na 315 miyon florin,” el a declara.

 

El a indica cu esaki ta inicio pa por logra un finansa publico ‘solido, transparente y duradero’. Ademas e surplus aki lo brinda e stabilidad financiero cu pais Aruba tin mester di dje.

E presupuesto ta conta cu algun cambio relaciona cu e informacion cu lo wordo brinda na e parlamentarionan, y tur esnan interesa, esaki nan entre otro pa medio di grafico y tabla. Tambe un relacion riba locual ta wordo presupuesta y e maneho cu ta wordo hiba. Tambe pa prome biaha den historia e presupuesto di pais Aruba ta wordo acopla na e metanan di e SDG’s di Nacionnan Uni.

Bista general.
El a duna un bista general di e diferente componente di e presupuesto aki: debenan, likides, gasto di personal, subsidio, etc. Pa loke ta entradanan, pais Aruba ta conta cu 1.569 miyon florin. Mientras cu e gastonan ta presupuesta na 1.523 miyon florin.

E gasto mas grandi ta esun di personal cu 476 miyon florin. Maduro a indica cu e cifra aki ta cumpli cu e palabracion haci cu Hulanda a base di e protocol firma. Otro gasto presupuesta tin di haci cu servicio y producto cu un suma di 203 miyon. E gasto di pago di interes relaciona cu e debe nacional ta na 221 miyon florin. Den e presupuesto ta poni cu gobierno lo gasta 216 miyon den subsidio.

Pa loke ta entrada pa concepto di belasting, gobierno lo ricibi 567 miyon di belasting directo y 644 miyon di belasting indirecto. El a bisa cu considerando cu nos ta bayendo mas den direccion di belasting indirecto, nos por mira cu e cifra aki ta mas halto, ya cu lo bin algun aumento. Pero tambe lo wordo introduci algun belasting den cuadro di e cambionan di e reforma fiscal cu pronto lo ta caminda pa parlamento.

Den inversion gobierno tin presupuesta 20 miyon florin den su presupuesto 2020. Pa locual ta gasto di fiansa pa estudio, e ta un suma di 30 miyon.

Na final minister Maduro a gradici tur esunnan cu a traha hunto pa bin cla cu e presupuesto aki. El a agrega cu e resultado di e presupuesto aki ta un esfuerso conhunto di henter un pais pa bay den un rumbo di un finanzas publico manehabel, duradero y sostenibel.