Segun gobierno pa Caft presupuesto 2017 ta realistico awor

Despues intercambio di corespondencia , cambio, ahust’e y te tiramento di palabra rond di presupuesto 2017, gobierno a anuncia ayera cu nan a ricibi e certificacion di e colegio supervision  Caft den direccion cu e presupuesto 2017 ta realisabel of  realistico.

E anuncio aki a bira un ocasion clave pa premier Mike Eman  elogia e maneho financiero di su gabinete; y e trabou cu minister di Financia, Angel Bermudez  y otro ministernan cu a yega di ocupa e cartera aki,  a yega di realisa pa finalmente gobierno lo  por logra un presupuesto balansa.

Certificacion di Caft
Minister Bermudez a bisa cu aña pasa tabata un esfuerso grandi pa gobierno por a logra pa prome biaha  den historia di Aruba fei di Status Aparte, entrega tanto e cuentanan anual  como e presupuesto supletorio 2016 y tambe e presupuesto 2017 na parlamento cu a keda aproba prome cu fin di aña. El a menciona cu unabes cu e presupuesto 2017 a keda aproba, el a mand’e digital atrobe pa Caft; y a cambio el a ricibi un carta cu a sali publica te hasta ariba di nan website. Den e carta aki e colegio di supervision a pidi diferente splicacion y informacion basico riba gobierno a yega na e calculacionnan di e presupuesto aki pa asina Caft por haya un idea y emiti un huicio si e presupuesto ta realisabel si of no. Nan a conclui si diferente parti no tabata parce realistico.

Pero diaranson anochi gobierno a ricibi un certificacion positivo di Caft tocante e presupuesto menciona.  E parti clave cu nan mustra di e certificacion di CAFT  ta bisa textualmente asina: “Het Caft is van oordeel dat met deze toelichting Aruba voldoende onderbouwd heeft dat de vastgestelde begroting 2017 voldoet aan de norm uit artikel 14 lid 2 Laft die behelst dat het tekort van de collectievesector in 2017 maximaal 0,5 BBP bedraagt.” Minister Bermudez tabata  hopi satisfecho cu e certificacion aki; pero e ta admiti cu ainda nan no ta full cla y nan no a yega ainda na e caminda cu mester yega. Pero si e ta un confirmacion  cu esaki ta e ruta cu nan mester cana pa yega na e presupuesto balansa.  E mandatario a laga sa cu e  no tin problema pa distribui e rapport ultimo di Caft, ya cu e mesun rapport aki ta wordo publica dor di e colegio di supervision aki a base di e stipulacion cu tin poni den e ley Laft. “Unabes cu e ta bira publico, di mi banda nos por distribui na prensa, sin niun problema.”

Deficit y surplus
Premier Eman a bisa cu lo pronostica e deficit riba 0,5% kiermen cu e deficit presupuestario na 24 miyon florin. Pais Aruba a yega di conoce un deficit  ariba di 200 miyon florin.  “E 24 miyon awor ta un cifra hopi abou y e otro aña nos por papia riba un surplus.” E mandatario a laga sa cu den e conseho di Caft, gobierno tambe a haya autorisacion pa fia 438 miyon di cual 25 miyon so lo ta pa cubri e deficit di e aña aki. E resto lo wordo destina pa refinancia e deficit of debe di tur e añanan anterior.  E ta haya cu si nan por logra  kita e interes cu ta pisa ariba presupuesto di pais Aruba,  gobierno lo por produci un surplus di mas cu 100 miyon riba presupuesto. E mandatario ta spera cu un dia pais Aruba lo por logra den Reino of pafo di Reino cu otro tipo di organisacion di credito  internacional cu por duna nos un tasa di interes abou entre 1 pa 3%. Y no  esunnan  di 5 y 6% di interes cu tin biaha nan ta hayando for di instancianan cu ta fia placa .

Sr. Bermudez  ya caba a bisa cu unabes cu nan ta yega na e surplus pronostica, gobierno lo keda reduci e debe nacional.  Ya caba Caft ta indica cu pa  medio di e presupuesto di 2017, e debe nacional lo baha cu 2 punto. “Pero naturalmente e ruta ta largo ainda.” E intencion ta pa reduci e debe nacional pa asina haya mas espacio den presupuesto pa  paga menos den interes.

Crecemento economico
E echo di por a logra reduci e deficit presupuestario  na e cifra actual “no ta un simpel calculacion di algebra”, segun minister Bermudez. Sino cu e ta demanda un analisis y ehercicio constante pa tene cuenta e efecto cu e medidanan adopta  lo por tin riba nos economia. E tendencia ta cu ora bo ta cuminsa baha gasto di gobierno, esaki tin su efecto riba economia. Pero di otro banda tambe mester tene cuenta cu e crecemento economico; ya cu actualmente  e crecemento economico global no ta bayendo manera a wordo pronostica aña pasa, el a bisa.
E decrecimento  economico global tin su efecto  riba tur economia, sigur esun di nos pais, ya cu nos tin un economia chikito, “manera un pipita di pinda den un macutu grandi di economia nan grandi di mundo”, segun minister Bermudez. Den nan ehercicio pa reduci e deficit nan ta analisa e efectonan cu por tin riba nos economia pa percura di por keda cu cierto desaroyo economico. E ta un forma pa evita asina e spiraal cu Corsou a cay den dje, caminda nan presupuesto ta cera, pero nan economia no ta creciendo.

E logro aki no  a bay facil –asina minister Bermudez a bisa- ya cu nan mester domina nan gastonan, pero tambe cobra loke nan mester cobra a base di nos ley fiscal. “E ehercicio mutuo aki ta duna su fruta cu nos por yega na un deficit menos atrobe. Esey ta e ruta cu ta hiba nos  na financia publico sostenibel.”

Critica
Tambe minister Bermudez a probecha pa declara cu a pesar di hopi pesimismo cu tabatin y te hasta criticanan cu nan presupuestonan no tabata uno realisabel, sostenibel, ni realistico; realidad a mustra otro cos. Despues cu el a restructura presupuesto 2014 y 2015, y nan cuenta anual y nan a logra ehecuta nan. E mesun situacion a presenta cu e presupuesto di 2016; y e ta spera cu esaki lo keda aproba pronto. Otro siman nan lo bin cu e ultimo kwartaal di aña pasa; y asina nan por tin un idea con e ehecucion di presupuesto 2016 a bay; pa traha nan respective  cuenta anual.

Sr. Bermudez ta haya cu e tipo di ehercicio aki a yuda pa Caft por haya e impresion y confiansa cu gobierno por logra cumpli cu nan presupuestonan manera nan a traha nan.  Pero e logro aki a demanda hopi trabou di su personal, specialmente di departamento di Financia cu a traha bou “basta presion”.