Un ley cu pronto lo wordo trata ta esun di presupuesto 2017. E lo wordo trata despues di e ley di Citgo cu ta wordo debati e siman aki, ya cu ambos ley tin corelacion cu otro riba asunto di entrada di gobierno y su gastonan presupuesta pa otro aña.
Sinembargo ainda e preguntanan cu e parlamentario mester a formula na gobierno no a wordo entrega, y eventualmente e tratamento di e ley di presupuesto lo wordo debati despues di mita di october venidero.
Presidente di Parlamento, Sra. Mervin Wyatt-Ras a declara na Bon Dia Aruba cu e ta un persona cu ta percura pa tur cos bay eficiente, y como politico semper e ta purba di wak tur dos banda. Sinembargo tin biaha tin miembronan di parlamento cu kier mas tempo y logicamente e decision aki ta keda na nan. Pero e ta kere cu dependiendo di e embergadura di un ley manera presupuesto, no tur parlamentario ta traha mescos.
Den e caso di ley di presupuesto, Sra. Wyatt-Ras a bisa cu nan a hay’e dia 31 di augustus ultimo y supuestamente nan mester a cuminsa les’e pa traha nan preguntanan. Sinembargo diamars ultimo nan a tene un reunion pa miembronan di Parlamento entrega e preguntanan, considerando cu a transcuri varios dia cu e concepto di ley aki ta disponibel pa tur miembro di Parlamento. Pero tabata full un discusion riba e fecha di entrega di e preguntanan. Considerando e situacion aki cu no tur parlamentarionan a bin cla cu nan preguntanan, tambe e fraccion di AVP a bay di acuerdo pa pospone te cu 16 di october, asina Sra. Wyatt-Ras a bisa.
