Minister encarga cu Financia Angel Bermudez a caba di haci entrega di e presupuesto 2017 di Pais Aruba na parlamento. Prome minister Mike Eman a comenta riba esaki durante e conferencia di prensa riba e deal di Valero awe tardi. E ta divulga cu gobierno a presupuesta e deficit financiero di 2017 riba 0.5%. “Cual ta mas abou cu esun di Hulanda”. E tambe ta remarca cu Aruba a logra e deficit abou aki riba su mes, sin sosten financiero manera e otro islanan cu a bira independiente (Corsou y St. Maarten). Y e ta enfoca riba e vision di su gobierno pa den tempo malo economico pa enbes di corta riba su gastonan, keda inverti pa asina drecha e economia bek.
Durante dia a mustra cu kisas e entregamento lo no a tuma luga como cu e presupuesto tabata na Gobernador ainda y minister Bermudez a indica cu e por tuma minuut sea dia pa e yega parlamento. Finalmente e ley a yega na tempo. Segun nos constitucion e presupuesto tur aña mester ta na parlamento por lo ultimo 1 di september. Mayoria di gobierno ( di MEP y AVP) no a logra esaki durante e 30 aña cu Aruba ta riba su mes (Status Aparte). Pa e gabinete Mike Eman (ambos periodo di gobernacion) e ta e prome biaha cu e presupuesto a yega parlamento na tempo.
