Despues di dos siman di tratamento, diahuebs ultimo Parlamento a pasa e presupuesto 2017 di pais Aruba cu 12 voto na fabor anto 7 voto contra. Aworaki e caminda ta sigui cana pa esaki bay College Aruba Financieel Toezicht pa scrutinacion anto despues pa Gobernador finalisa e proceso cu su firma. Tur cartera ta wordo maneha separa pero ora ta trata di votacion, tur cartera ta wordo vota den su totalidad anto segun presidente di Parlamento, presupuesto 2017 a wordo trata cu hopi mas profundidad.
E presupuesto ta wordo vota den un solo pakete y ta wordo entrega como un solo presupuesto di pais Aruba consistiendo di tur e otro ministerionan. Segun presidente di Parlamento, e biaha aki e tratamento di presupuesto a bay hopi mas profundo. “Por ehempel ora di papia di salud, tur hende tabata concentra riba salud y pami den e manera aki bo tin un miho enfoce. ” A bin hopi mocion tambe pa dilanti cu segun sra. Wyatt Ras, tin biaha no ta bini mucho tampoco. Naturalmente tin beneficio den e otro sistema tambe di trata presupuesto unda cu bo ta bisa porta bo ta keda cla mas lihe pasobra bo tin tur e ministernan hunto pa haci pregunta den e sala. Sra. Mervin Wyatt Ras ta bisa Bon Dia Aruba: “Dus e tin su bon y su malo ora di trata e presupuesto den e manera aki, ami en todo caso a haya cu vooral e profundidad cu nos por a bay tabata hopi bon.”
Hopi mas tempo
Presidente di Parlamento ta sigui bisa: “Cu e sistema aki nos ta duna e parlamentario mas tempo. Inicialmente e tabata 40 minuut pa e prome ronda y 20 minuut pa e di dos ronda, e biaha aki nan tin 90 minuut pa e prome ronda y 45 pa e di dos ronda y atrobe nos a bati un record cu hopi mas ora. Parlamentarionan a haya hopi mas tempo pa por a haci nan preguntanan per ministerio.” Den e forma aki segun e presidente di parlamento, parlamentarionan ta haya e oportunidad pa bay mas profundo riba cada ministerio. Cada un parlamentario ta maneha e tempo na nan manera segun nan expertisio pasobra segun sra. Wyatt Ras, tin cu ta bisa cu nan no ta mucho concentra riba por ehempel turismo, dus lo uza su tempo pa dialoga mas riba por ehempel economia of un otro cartera.
Separacion di presupuesto
Semper cada ministerio tabata tin cierto ley, despues nan a consolidanan den un ley anto tin argumentonan pro y contra pa cu dicon e cambio aki a wordo haci. Bon Dia Aruba a puntra Andin Bikker, lider di fraccion PDR su opinion riba esaki kende ta bisa cu: “Aworakinan door cu e ta un solo ley, basicamente como parlamento, ta un oportunidad bo tin pa cu desaprobacion di un maneho specifico di un of mas cartera pasobra e ta den un pakete total. ” E presupuesto con cu bay bin, a base di cifra, grandemente e ta representa maneho. Segun sr. Bikker, si bo separa e leynan den cada ministerio,como parlamentario bo tin mas influencia den areanan specifico pasobra aworaki e ta hopi general y ta culmina den un solo votacion. “Aruba dus no conoce coalicion pa hopi tempo anto esey ta pone cu bo ta haya tratamento di un ley den e caso di presupuesto cu na final bo sa cu door cu ta mayoria, e ta bay wordo aproba. Caminda cu si bo tin diferente ley cu ta representa cada ministerio, den mi concepto anto, bo tin mas oportunidad pa convence e mayoria den parlamento cu un ministerio specifico,” sr. Bikker ta splica.
Presupuesto irealistico?
Referiendo na e Ministerio di Husticia por ehempel, den e presupuesto cu a wordo trata henter e siman akinan, Raad van Advies ta constata cu e tabata contra nos ley di contabilidad. Pasobra e tabata 6 pagina di cual ta “copy paste” di varios aña caba anto a base di Ley di Contabilidad, Raad van Advies terecht a bisa cu bo mester duna un “inzicht” cual ta mucho mas cu 6 pagina pa splica por ehempel kico bo ta bay haci cu 190 miyon florin. “Pero ya, esey no por a bin pa dilanti pasobra no tin e separacion di presupuesto manera cu nos ta papiando kinan di dje,” sr, Bikker ta bisa. Al contrario di loke gobierno ta bisa segun sr. Bikker, si no tabata pa entre otro e ‘belastingmeevaller di Citgo’ e presupuesto aki no lo cumpli cu e normanan anto den su concepto esaki ta algo cu no ta sostenibel. “E maneho di husticia por ehempel anto e maneho di casnan social cu 8 añanan cu nan tin den gobierno, nan no por a traha casnan social. Eseynan ta cosnan cu mi ta haya hopi fundamental pa un gobierno. Seguridad, casnan pa pueblo, servicio di debe. Door cu nan a redobla e debe nacional, a pone cu aworaki nos ta pagando dobbel na interes cu a bay te 215 miyon, y cu ta bay subi segun Raad van Advies, na 2019 te 230 miyon. No por ta pretende cu tin maneho financiero responsabel,” sr. Bikker ta splica Bon Dia Aruba.
Presidente di Parlamento ta bisa cu e sistema pa trata cu e presupuesto den e manera aki: “Parlamentarionan por a papia segun nan ta desea y griffier e ora ta tene hunto cu un lista unda tur hende por wak di otro tambe precisamente cuanto ken a uza etc. No pa compara, mi kiermen nos ta transparente, nos por a wak e anto ami ta haya cu el a duna un bon resultado den e sentido cu door cu tur hende ta wak nan tempo, nan a haya hopi mas ora pero tog nan a haci preguntanan hopi dirigi.”
