Den e dianan aki presupuesto 2016, cu mester a keda aproba prome cu fin di 2015, lo ta den Parlamento. Atrobe por haci e pregunta con realistico e presupuesto aki ta. Fuera di algun ahustacion menor, basicamente esaki ta e presupuesto cu a haya un comentario negativo di CAFT den ultimo parti di aña pasa caba. En bes di bay molestia tur hende cu un cantidad di cifra, laga nos purba duna un imagen general den ki direccion e presupuesto ta move. Prome cu tur cos, ta bon pa constata cu un presupuesto ta nada mas cu un ‘presupuesto’: un calculacion di antemano loke ta supone ta e gasto y entradanan. Cu tin diferencia entre e cifranan di e presupuesto y e resultado final di e aña, ta di comprende. Pero esey naturalmente dentro di cierto limite. E realidad ta cu na Aruba financia publico ta asina problematico, cu ta traha presupuesto y aproba esey, surpasa esey y crea uno suplementario, aproba esaki y despues laga Algemene Rekenekamer constata cu a surpasa esaki tambe cu decenas di miyones.
Ta p’esey tambe no tin tanto sentido si nos ta solamente contempla y compara presupuesto cu presupuesto. Ta importante pa tira un bista riba e cifranan real di loke ta gasta y ta drenta den caha di gobierno. Esey ta particularmente e caso na momento cu pa desaroyo menos faborabel, gastonan ta resulta mas halto y entrada ta varia segun e coyuntura economico. Esaki ta e caso tambe den aña 2015, unda cu tanto entrada a keda atras compara cu loke a spera, como tambe gastonan di aparato publico a resulta mas halto cu a planifica.
Sin embargo, nos ta mira cu atrobe ta planifica un entrada relativamente halto pa 2016, mientras cu e cifranan real pa 2015 no ta duna e imagen aki. Esaki tanto den e comentario di Raad van Advies como di CAFT ta bin dilanti. Ademas oficialmente ta conta cu entrada for di introduccion di e ABB, cual ainda no a tuma luga y ya por descarta eventual entrada cu lo por a haya den e prome parti di e aña aki. Pa motibo di esaki RvA ta pensa cu e deficit di presupuesto lo ta mas halto cu e Afl. 103 miyon cu gobierno ta maneha, loke lo a resulta den mas o menos 2% di GDP, cu ta cumpli cu e norma estableci den e plan multi-anual di rehabilitacion financiero di gobierno. Di otro banda, practicamente no tin tanto ahustacion di gasto, sigur no den e categorianan principal manera gasto di personal, bienes y servicio y interes riba debe.
Pa ta mas specifico den esaki: riba papel tin un reduccion chikito di 6 miyon programa den gasto di personal, pero e gastonan real di 2015 ta surpasa e cifra teoretico cu a pone pa 2016. Loke nos por observa cu na aña 2014 e reforma di e fondo di pension di ambtenaar (APFA) a duna gobierno un ‘rosea’ momentaneo, pero cu e otro categorianan di gasto di personal (salario di ambtenaar y e sector subsidia) no ta mustra di ta yuda pa reduci gasto. Por observa cu por ehemplo a reduci un poco e cantidad di personal trahando na e despachonan di e ministronan, aunke el a keda un cantidad astronomico nunca bisto den gobernacion di Aruba (keto bay mas di 300 persona), pero e realidad ta cu un cierto cantidad di nan a pasa di contractant pa ambtenaar den servicio permanente. Contal cu den e casonan ey no a economisa nada, al contrario a aumenta e compromisonan financiero pa Pais Aruba a largo plaso. E peso grandi di mas di 7000 salario pa luna, entre ambtenaar y sector subsidia, a keda practicamente mes grandi.
Banda di esey e gastonan di Bienes y Servicio pa 2015 ta mustra atrobe cu nan ta bay den direccion di 220 – 230 miyon florin, mas cu e 220 miyon cu segun cifra di Banco Central a gasta na aña 2014. Ta resulta dificil, si no imposibel pa mantene e gastonan aki bao un cierto nivel, sin afecta e operacion diario di e aparato gubernamental. Por lo tanto por bien descarta e categoria aki ora ta trata di baha gasto.
Otro categoria importante ta esun di interes, cu pa motibo di mas prestamo ta bolbe subi cu mas o menos 5% na 2016, compara cu e aña anterior, pa un debe total di 4131 miyon. Hunto e tres categorianan aki ta representa un gasto fiho cu ta come henter e entrada di impuesto. Cu e agravante cu e entradanan aki no ta mustra progreso, a pesar di e incremento chikito cu oficialmente ta señala den nos economia, cual no ta traduci den mas entrada pa gobierno. Cu e otro entradanan cu no ta impuesto tambe stagnando, entre otro dividend di e empresanan y institucionnan estatal, realmente no ta mira con gobierno por nenga redondamente di baha su nivel di gasto. Cu un mayoria complaciente den Parlamento e presupuesto lo ser aproba y cu un gobierno di Reino cu por lo pronto no ta reacciona, aña 2016 tambe ta bira uno problematico.
