Prestamo di Credit Suisse a yuda cu rosea financiero

Parti di un prestamo cu pais Aruba a haya for di Credit Suisse ta na caminda otro siman. E lo yuda cu e rosea financiero cu pais Aruba mester, mientras gobierno di Aruba ta negosha cu Hulanda e pakete di condicion cu nan a bin cune.

Director di Finanzas, Derrick Werleman kende a duna un actualisacion di e panorama financiero nacional na Parlamento, a informa cu un prestamo pa un suma di 214 miyon florin, pais Aruba ta e proceso di bin cla cune. E ta spera cu den e siman proximo e proceso aki lo bin cla, ya cu e ta yuda pa cubri un gran parti di nos rekisito financiero.

Ta asina cu e rekisito financiero di e aña aki ta 1.4 miyar of 1 biyon florin. Un gran parti di e suma aki, pais Aruba a haya caba via di ayudo di likides di Hulanda. Mas cu 200 miyon florin a drenta den caha di gobierno pa medio di e ayudo di likides aki. Mientras cu ainda ta pendiente un total di 204 miyon florin di e di tres trans di ayudo di financiero di Hulanda. E suma aki ta wanta tanten e negociacion entre gobierno di Aruba y su similar di Hulanda riba e Rijkswet y pakete di condicion bin cla. E deadline lo ta te hasta unda nos rosea financiero ta yega.

Werleman a laga sa cu ainda tin un cifra di 700 miyon florin cu pais Aruba tin cu financia pa 2020. Pero di e suma aki tin 214 miyon di prestamo cu nos ta e proceso di bin cla cune. E ta spera cu den e siman proximo e proceso aki lo bin cla. E ta yuda pa cubri un gran parti di nos rekisito financiero. Riba e prestamo aki, minister presidente, Evelyn Wever-Croes, a contesta na Bon Dia Aruba cu e ta destina pa paga debe di september y december. E prestamo aki a bini for di Credit Suisse.

“E ta un refinanciamento cu nos debe, eigenlijk pa paga na september,” el a bisa.

Credit Suisse Group ta un empresa di servicio financiero y nan sede principal ta na Zúrich, Suiza. Nan ta ofrece servicio na clientenan priva y asesoria financiero integral di productonan bancario. Tambe nan ta ofrece nan servicio riba tereno bancario di inversion, intermediario financiero pa institucion y empresa priva y gubernamental.

Prestamo

E prome mandatario a agrega cu un parti di e prestamo, a drenta caba. Encuanto si e suma aki ta gewoon pa refinancia of si e lo tin otro destinacion, considerando e situacion di crisis di finanzas publico actual. Riba e punto aki, el a aclaria cu ademas di e refinanciamento, gobierno ta hayando un parti tambe pa paga interes.

E parti di interes aki gobierno ta use den e dianan aki pa “crea e rosea financiero” pa Aruba sigui negosha e pakete di condicion cu Hulanda a bin cune. E ta parti di e rosea cu nos tin ainda, y cu keto bay ta yegando su final. Aunke e ta wordo uza pa e proposito aki, e ta haya cu e ta un suma di interes cu pais Aruba tin cu page toch.

Un pregunta lo por ta: Con Aruba por a haya e prestamo aki meymey di e pandemia? Den e situacion cu nos finanzas publico ta actualmente, mercado internacional no ta dispuesto pa presta nos. Solamente Hulanda y bou condicion hopi stricto cu nos tur ta conoce a facilita ayudo financiero den forma di prestamo cu cero interes y pa dos aña. Sinembargo, premier Wever-Croes a splica cu e prestamo aki no ta cos di awor, sino cu e ta bin for di februari ultimo, net prome cu e coronavirus crisis a afecta nos pais.

Na apertura di cada aña gobierno su team di finanzas ta cuminsa busca refinancia nos debe, cerca mercado internacional. Aña pasa gobierno a cera cu 14 miyon florin di surplus. Na inicio di aña aki, pais Aruba su concepto di presupuesto tabata dispone di e surplus aki. Na momento ey -segun nos prome mandatario- gobierno tabata negoshando cu Credit Suisse caba pa tuma over e refinanciamento di aña 2020. “Nan a duna nan palabra,” el a bisa.

Despues cu Covid a drenta Aruba kibrando nos perspectiva financiero y economico, instancianan di evaluacion internacional, manera Standard & Poor’s y Fitch, a downgrades nos pais. Apesar di esey Credit Suisse no a hala atras, asina premier Wever-Croes a laga sa.

Gobierno a keda papia cu e instancia di credito aki pa duna Credit Suisse e confiansa, y gobierno a percura pa mantene e opcion aki habri. Hulanda su posicion di no refinancia nos debe di e aña aki a reforsa gobierno su decision di sigui mantene e opcion aki. E ayudo financiero cu Hulanda a brinda nos inicialmente ta pa gobierno atende cu nan compromisonan luna pa luna pa asina nos pais sigui draai den cuadro di e pandemia aki. E ta admiti cu e hecho cu Hulanda a duna un man na Aruba den e circunstancia actual, a crea un base di confiansa cerca Credit Suisse.

E hecho cu te awor e proceso di prestamo ta biniendo cla ta debi na e mesun situacion splica ariba, ya cu den circunstancia normal, un proceso asina ta tarda un par di luna so. Pero e biaha aki a tarda casi seis luna.