Den comienso di siman durante rueda di prensa semanal di gobierno, minister di Financia y Asuntonan Economico Xiomara Ruiz-Maduro (MEP) a elabora riba un biahe recien cu el a haci pa New York como tambe riba leynan trata e siman aki den parlamento di Aruba. El a laga sa cu e preparacionnan a cuminsa caba, institutonan financiero ta cla y rating bureaunan a aplaudi e honestidad y iniciativa di e gobierno di Aruba pa cuminsa actua mesora.
Pa Aruba por presta placa riba e mercado internacional, esaki lo ta pasando pa rond april 2018 segun minister Ruiz-Maduro. Pero prome cu e parti aki mester tin un plan cla, negociacion cu Hulanda mester tuma luga y autorisacion cu ta tuma luga pa e prestamo aki. E institutonan financiero ta cla, gobierno a papia cu e rating bureaunan cual tambe lo tin cu haci nan trabao al respecto segun e minister. E mandatario a sigui splica cu negociacion cu Hulanda ta poni pa cuminsa na comienso di otro aña.
Biahe pa New York
Ta asina cu e biahe recien pa New York tabata pa e ministerio sera conoci cu e institutonan financiero pero e tambe cu e rating bureau Fitch, Standard & Poors. Nan ta evalua cada biaha e sistema financiero di pais Aruba cu ta duna inversionistanan e parti cu nan inversion ta wordo salvaguardia. “Nos tur sa cu e situacion financiero di nos pais ta uno precario. Unda cu gobierno anterior a crea un debe grandisimo. Hunto cu e debe aki claramente bo ta paga e interesnan, esunnan cu ta facilita nos e placanan ta inversionistanan cu hopi di nan ta na New York”, e mandatario a expresa. P’esey e ora eynan mas cu claro como minister encarga cu e parti di financia, ta trece cu ne tambe cu e banconan aki kier a cera conoci den persona cu e mandatario nobo. “Pero tambe pa pro activamente papia riba e situacion cu nos a haya na pais Aruba na momento di traspaso di e gobernacion akinan.”
Prestamo
Tin e capabilidad disponibel den e capital pa por presta e fondonan aki na un interes toch basta faborabel pa nos pais segun minister Ruiz-Maduro. No a menciona ningun cifra pero nos deficit financiero manera a wordo informa caba, ta ya caba mas cu 130 miyon florin. “Aruba tin un bon nomber traha sigur over di e añanan cu nos pais tin ta acudi na e mercado internacional akinan”, e mandatario a comenta. A pesar cu e rating bureaunan ta haci nan trabaonan independiente, si ta asina cu nan a aprecia si cu Aruba a bin caba na un manera pro activo treciendo e situacion financiero real dilanti cerca nan. Y mas importante kico ta bay haci cu e parti akinan. E mandatario ta bisa cu nan ta trahando como gobierno di Aruba riba un caminda financiero real pa asina na comienso di aña 2018 presenta e plan aki. No solamente na pueblo di Aruba pero tambe pa Hulanda. Pasobra manera conoci Aruba ta cay bao supervision financiero di CFT. “Den cuadro cu esaki gobierno ta na altura cu e ley aki tin su normanan, cual mester por wordo negosha politicamente di nobo pa asina nan tambe keda real den e situacion cu nos ta actualmente. Pasobra den e momentonan akinan e diferencia ta uno grandi”, e mandatario ta bisa.
Financia publico manehabel
E banconan y agencianan di rating cu gobierno di Aruba a bishita na New York a keda satisfecho cu e bishita akinan segun e mandatario a enfatisa. Nan a aprecia e iniciativa pro activo di nos gobierno segun minister Ruiz-Maduro, caminda no ta warda te ora mester pidi e prestamo of warda te na momento cu mester haci evaluacion financiero pa bin y mira con e situacion ta. “Nos a mustra e pro actividad di bay y splica tambe con e situacion ta, y mas importante kico ta e pasonan cu nos ta bay tuma nos dilanti pa asina yega na termino mediano na locual ta un financia publico manehabel”, e mandatario ta bisa.
E minister encarga cu financia a remarca tambe cu banconan, abogado y companianan di rating a trece dilanti cu nan a wak berdad cu gobierno anterior no a tuma pasonan sostenibel pa sigui. Tin di e banconan y rating bureaunan aki cu tabata conoce caba e maneho di e tempo ey gabinete Oduber (MEP), cu segun minister Ruiz-Maduro, for di e tempo ey tabata tin elogio di con a dirigi financia publico. Pero despues di e maneho di e ultimo ocho añanan aki nan a mira deficitnan grandi a bin te cu bo ta yega na e parti di supervision financiero. “Nan tabata tin pregunta concreto riba esey y riba con nos ta mira e situacion di refineria akinan na Aruba.”
