Prestacion di hotelnan den januari 2023 ta surpasa expectativa

Minister di Turismo y Salud Publico Sr. Dangui Oduber ta sumamente contento y satisfecho cu e resultadonan di luna di januari 2023. Recientemente AHATA a publica su cifranan tocante e prestacion di e hotelnan y Minister Oduber tin e placer di por comparti esakinan cu pueblo. E cifranan aki ta ilustra e crecemento den turismo cu a tuma luga den e prome luna di aña 2023.

Manera ta conoci, e maneho di Minister Oduber ta dirigi riba turistanan di calidad y turistanan cu ta gana mas di 150 mil dollar pa aña, turistanan cu ta laga hopi placa atras den nos economia.

Segun un comunicado di prensa di AHATA, luna di Januari tabata mas exitoso cu e ultimo cinco añanan.

Januari 2023:

Ocupacion: E grado di ocupacion tabata 83%; cual ta menos cu na 2019 pero mescos cu 2020.

ADR: E balor averahe di cada camber bendi tabata $420.67; un aumento di 20% compara cu Januari 2019.

RevPAR: E entrada averahe pa tur camber disponibel tabata $349.26, cual ta un crecemento di 11% compara cu Januari 2019.

Minister Oduber den un comunicado ta añadi cu den luna di januari 2023 e grado di ocupacion a subi cu 72.1% porciento compara cu januari 2022. Esaki ta un porcentahe di 72.1% mas hopi cu e aña anterior, cual ta un porcentahe halto y e mandatario ta splica cu esaki ta refleha e crecemento continuo di turismo na Aruba.

Banda di e grado di ocupacion e REV PAR den luna di januari 2023 a conoce un crecemento di 102.9%. REV PAR den januari 2023 tabata $349.26 cu ta un cifra hopi halto. E REV PAR ta un indicador sumamente imporatante pa midi e calidad di turistanan cu ta bin Aruba. E REV PAR ta e prijs cu un turista ta dispuesto pa paga pa un camber pa anochi. Nos como pais mester ta contento cu e hecho cu nos tin un di e REV PAR mas halto den Caribe. Na momento cu bo tin un REV PAR asina halto e ta bisto cu turistanan di calidad ta yegando nos pais.

Turismo ta keda e driver principal di nos economia, resultadonan di luna di januari 2023 ta confirma cu Aruba su turismo ta riba e bon caminda. Maneho di Minister Dangui Oduber ta dunando e resultado conforme e vision di atrae turistanan di calidad y esaki a wordo confirma cu cifranan di AHATA. Esaki sigur ta un noticia hopi positivo. Finalmente e mandatario a gradici tur empleadonan y tur partnernan den sector turistico pa cu e resultado bunita aki.