Pa atende cu un di e causanan di accidente cardiovascular, manera stroke (derame celebral), ataca di curason, malesanan di riñon y morto prematuro, departamento di Salubridad Publico (DVG) y Ibisa ta enfoca riba presion halto.

Iraida Thijzen, kende ta hefe di e seccion di salud na Ibisa, a bisa cu dia 14 d mei nan a cuminsa cu un campaña di midimento di presion na diferente localidad, unda publico en general lo por bin midi nan presion.

Ya caba nan ta bin conscientisando riba presion halto y su consecuencianan. Pero den e fase aki, nan kier enfoca riba e hendenan cu ta sufri di presion halto y kico nan por haci. El a curasha tur hende pa participa den e campaña aki, ya cu e ta totalmente gratis. Unico cos cu e ta costa bo, ta menos di ‘cinco minuut pa haya sa bo numbernan, cu ta numbernan sumamente importante pa bo salud’.

Dr. Steven Croes, kende ta na servicio di Ibisa y DVG, a bisa cu nan ta atendiendo un par di siman caba cu e midimento di presion den cuadro di nan campaña. E importancia di control aki tin di haber cu e malesa di presion halto ta uno generalmente silencioso, y no ta causa niun sintoma. Esaki ta trece cune cu e persona cu ta sufri di presion halto no ta pone atencion, pasobra e no ta sinti nada.

Esaki ta e creencia cu DVG y Ibisa kier kibra, pa nos comunidad por ta mas consciente cu a pesar cu bo no ta sinti nada, bo por ta presentando e malesa aki. P’esey Croes ta considera importante pa continua cu e parti di midimento aki, cu nan ta bin realisando pa sigui conscientisa nos comunidad.

Estadistica
Funcionario di epidemiologia y investigacion di DVG, Eugene Maduro a trece dilanti algun estadistica of cifranan di e ultimo investigacion na nivel nacional pa duna un bista di e situacion di presion halto riba nos isla, ya cu e ta un factor di problema di salud, specialmente di curason.

E resultado a mustra cu como 90% di e participantenan (alrededor di 180 hende) a mustra un presion eleva y/of halto. Nan ta datonan cu DVG a colecta pa medio di un investigacion di salud cu nan a realisa na 2016-17.

Igualmente -segun dato colecta pa e departamento aki- 1 di cada 3 morto na Aruba ta relaciona cu malesa di e sistema circulatorio. For di 1999-2017 alrededor di 3600 persona a fayece a causa di malesa circulatorio/ cardiovascular. Den e periodo aki, como 9% di nan -cu ta un total 330 hende- a muri a causa directo di presion halto. E ta un averahe di 6 morto pa aña.

Presion halto ta un factor di riesgo den salud publico. E encuesta nacional cu a wordo realisa tabata inclui personanan di nos poblacion entre 0 pa 100 aña. Mientras un grupo di hende di 20 aña pariba a wordo selecta pa forma parti di un investigacion medico, unda entre otro midimento di presion a wordo tuma. E datonan aki ta refleha cu 9 di cada 10 hende cu a participa den e investigacion aki, tin un presion halto.

Tambe e investigacion aki a produci e cifra cu 1 di cada 4 hende homber y 1 di cada 4 hende muhe tin un presion halto. 7 di 10 hende homber cu a participa di e midimento aki tin un presion arterial halto caba. Den hende muhe esaki ta 6 di cada 10 cu a participa. E promedio di edad reporta den e investigacion aki cu tin un presion halto ta esunnan mayor di 65 aña.

Maduro a trece cifra di Organisacion Mundial di Salud (WHO), cu ta indica cu tin alrededor di 1.13 biyon hende mundialmente cu ta sufri di presion halto. Paisnan manera Africa y Rusia tin e cifranan mas halto di presion halto na mundo.