Presion di sanger ta e presion of forsa cu e sanger cu ta circula ta eherce contra e parti paden di e arteria.
E palabra aki ta un di e mas uza ora ta papia di funcion di sanger. E presion pa un persona saludabel mester ta mas of menos 120/80. E ta wordo expresa den dos palabra masha comun: sistolic y diastolic.
Sistolic y Diastolic
Sistolic: Ta e balor halto cual ta e presion cu e sanger ta eherce na e parti paden di e arteria ora e curason ta contrae su mes pa pomp sanger den e arteria.
Diastolic ta e presion cu e sanger ta eherce contra e parti paden di e arteria ora e curason ta relaha despues di e contraccion.
Ta bon pa nos lector sa cu bao circunstancia normal e presion di sanger adecuado ta 120/80 mmHg . Abnormal ta 140/90 mm Hg bay ariba. Un presion halto abnormal por tin repercusion serio pa e hende su salud pa loke ta hopi importante keda monitor presion di sanger di manera constante.
Temperatura di curpa
Temperatura normal di curpa ta 37 grado Celsius of 98.6 Fahrenheit. Un temperatura normal ta un señal cu e persona ta saludabel y no ta sufri di ningun malesa. Pero di otro banda, tanto e temperatura como e presion di sanger ta señal cu ta yuda e dokter pa diagnostica diferente malesa. Pero con e temperatura tin relacion cu e presion di sanger? Ta bon pa nos ta consciente di esaki vooral den e temporada di hopi calor aki na Aruba.
Presion halto ta ora e sistolic ta subi na 140 of mas y e diastolic ta subi na 90 of mas. Ora un persona ta wordo exponi na calor of temperatura halto, e persona ta cuminsa soda masha hopi y e por deshidrata, esta perde likido. Esaki ta baha e volumen di sanger lo cual ta baha e presion di sanger.
Di otro banda si un persona ta sufri di un malesa, unda keintura ta un di e sintomanan, e ora ey e persona lo experencia presion halto di sanger, kiermen keintura ta hisa e presion. Durante e keintura e presion ta subi y e batimento di curason ta bira mas lihe.
Presion halto y sucu
Presion halto y sucu halto ta afectando mas mucha cada dia. Journal of American Medical Association a publica un articulo unda un investigacion a wordo haci pa e Instituto Nacional di Curason y Pulmon di Merca tocante e presion halto cerca muchanan. E estudio a revela cu den dos aña di tempo e averahe di muchanan cu ta sufri di presion halto a hisa dos punto. Segun dokternan y expertonan medico, nan ta bisa cu e rason tras di e presion halto cerca mucha ta debi mas tanto na e sintomanan di gordura y obesidad. Pa e motibo ey, ta un responsabilidad di e mayornan tene cuenta cu e presion di muchanan cu tin mas chens di haya presion halto, pa evita problemanan di salud mas grandi den futuro.
Presion di sanger den mucha
E presion cerca un mucha semper ta mas abao cu esun di hende grandi. E numbernan por varia di acuerdo na edad y actividad fisico di e mucha. Un mucha di un aña su presion normal ta entre 85-93/ 37-50. Un mucha di 9 pa 12 aña su presion por ta entre 100-106/61-61. Un mucha di 17 aña su presion normal lo ta entre 106-118/62-67. Asina nos por mira cu mas edad e mucha tin, mas e ta acerca na e balor nan normal pa hende grandi.
Ora e lecturanan ta basta ariba di loke nos a skirbi antes, e mucha ta wordo diagnostica cu un presion halto. Un mucha por tin un peso normal, esta no ta un persona gordo, pero si e ta bao di un situacion di stress constante, esaki por hisa su lectura di presion.
Muchanan di un pa dos aña cu ta yora hopi cu ta biba irita y no ta gana peso mester check su presion di sanger. Otro condicion nan medico manera abnormalidadnan di curason, malesa di riñon y diabetes tipo I tambe ta causa di presion halto. Sin embargo e rason mas importante di presion halto cerca muchanan ta e gordura. Ta asina importante pa e mayornan cuminsa for di trempan implementa un estilo di bida saludabel.
Factornan
Tin diferente factor di cual presion di sanger ta depende y nan ta varia. Algun di nan ta controlabel pero otro manera diabetes y factornan hereditario no ta wordo controla. Ata aki algun factor cu ta afecta e presion:
– Ehercicio frecuente por baha e presion. P’esey hende cu ta sufri di malesa cardiovascular mester practica ehercicio frecuente.
– Uzo di alcohol por hisa di manera severo e presion di sanger y hiba esaki na nivelnan hopi halto mes.
– Stress mental por ta responsabel di hisa e presion.
– Custumber nan alimenticio ta un di e mayor responsabel di e cambio den presion di hende. Mantene un dieta saludabel lo mantene e presion di sanger den nivel nan normal.
Consehonan pa keda leu for di presion halto
– Baha mano riba salo y sodium di bo dieta y concentra riba cuminda saludabel;
– Limita e consumo di alcohol y stop di huma;
– Haci ehercicio di manera regular;
-Sigui un estilo di bida saludabel y keda fit.
