(NTN24) Presidente di Estadonan Uni, Donald Trump, a firma ayera un orden ehecutivo cu ta prohibi “tur transaccion cu cualkier moneda digital” emiti pa gobierno Venezolano, manera e Petro.
Mas specificamente e orden ehecutivo ta prohibi, tur transaccion relaciona, tambe e provision di financiamento y otro transaccion pa un persona di Estadonan Uni, o dentro di Estadonan Uni, cu cualkier moneda digital cu por ser emiti pa, o na nomber di gobierno di Venezuela desde 9 di januari 2018.
Den e texto, Trump ta argumenta cu a tuma e decision “den luz di e reciente medidanan adopta pa e regimen di Maduro pa intenta aludi e sancionnan” cu e emision di un moneda digital, den un proceso cu “e Asamblea Nacional eligi democraticamente pa Venezuela a denuncia como ilegal.”
Cu e respaldo di e reservanan di crudo, e presidente Venezolano, Nicolas Maduro, a lansa e criptomoneda luna pasa, pa amplia e capital di e pais, hogando den crisis y pa evadi e sancionnan financiero imponi pa Merca.
E senador democrata Bob Menendez y e republicano Marco Rubio, e dos nan mas activo contra gobierno di Venezuela den congreso Mericano, a adverti Trump pa e consecuencianan di e moneda digital, poco despues cu Maduro a anuncia esaki.
Ambos senador, miembro di e comite di relacion exterior di senado, a manda un carta pa e secretario di Tesoro, Steven Mnuchin, pa conoce e mecanismonan cu cual gobierno Mericano ta conta pa combati e criptomoneda, loke a resulta den e prohibicion emiti.
E presidente Venezolano a anuncia e emision di 100 miyon Petro na inicio di aña, un unidad cu Maduro a presenta como e criptomoneda di Venezuela y cu ta igual na e balor di un bari di petroleo Venezolano riba mercado internacional; como tambe “e activacion y uzo di e casnan di cambio virtual conoci como ‘exchange’. Desde cu Trump a yega na mando, gobierno Mericano a sanciona como binti dirigente Chavista, entre nan e propio Maduro y su vice-presidente Tareck El Aissami.
