Presidente Mericano Donald Trump a sigura diamars na Puerto Rico cu e pasada di horcan Maria no tabata “un catastrofe real” manera e ciclon Katrina, destacando e cantidad abao di victima mortal, y a adverti cu e presupuesto federal ta for di balansa como consecuencia di e dañonan grave.
“Si bo mira un catastrofe real manera Katrina (…), cientos y cientos di persona a muri, y mira loke a pasa aki, cu un tormenta cu realmente tabata abrumador, ningun hende a mira algo manera esaki,” Trump a comenta na San Juan, referiendo na horcan Katrina cu a destrosa New Orleans na 2005 y a laga mas di 1.800 morto.
“Cual ta e saldo mortal na e momento aki? 17? 16 morto confirma, 16 compara cu miles,” e mandatario a bisa, cu a ricibi fuerte critica pa e reaccion federal lento mirando e dañonan di e horcan Maria, y su atakenan directo riba autoridadnan local, cu el a acusa di “pober liderazgo”.
Trump a gradici e labor di e gobernador di e isla, Ricardo Rosselló, durante e emergencia despues di e pasada di e horcan. “Tur na e mesa por ta orguyoso di loke ta pasando na Puerto Rico. Mi ta duna mi reconocimento na Fuersa Naval pa su trabao den trece cos pa e isla, apesar cu no tin puerto,” Trump a resalta.
Trump a resalta cu Guardia Costera, cu tambe tabata activo durante e emergencia na e isla, “a salba 16 mil bida na Texas.”
Di su parti e gobernador Rosselló a indica cu “nos forsanan ta trahando pa duna alimento y awa na pueblo di Puerto Rico.”
Autoridadnan politico local a denuncia cu e mandatario Mericano no a ofrece e asistencia necesario na e isla, y cu e ayudo di prome necesidad no tabata suficiente.
