Presidente Donald Trump a firma un proyecto di ley di crueldad animal, atacando productornan di video ‘horibel y sadistico’ di crueldad animal cu sentencia di prizon, mientras yerno Lara Trump ta bisa cu e ‘no por ta mas emociona’.
Senado a aproba di forma unanime e ley di prevencion di crueldad y tortura di bestia, despues di un votacion similar di e Camara di Representante fin di october. Ta aplica na paloma, reptiel, anfibio y mamifero no humano, basa riba un ley di 2010 cu ta criminalisa e distribucion di asina-yama ‘crush video’ of imagen pa satisface ‘fetiche sexual inusual’, door di tambe prohibi produccion di e videonan.
E produccion di video ta consisti di filma un animal y con ta mata esaki. E ley nobo ta amplia e definicion pa inclui kima, hoga of sofoca un bestia, of haci algun daño grave na nan.
Trump ta bisa cu e proyecto di ley lo evita pa persona comparti imagen di crueldad. “Ta importante pa nos combati e actonan horibel y sadistico di crueldad aki”, el a bisa.
Lara Trump, defensor di bienestar animal, a bisa DailyMail cu e ta orguyoso di su suegro (Trump) kende a duna firma pa e legislacion.
“Nos bestianan ta miembro di famia y nos cacho di trabou ta manera nos heroe. Cualkier movemento pa señala y enforsa un ambiente positivo pa e animalnan maraviyoso aki ta un stap den e direccion corecto”, Lara Trump a bisa.
Den e ley tambe ta inclui excepcion pa otro variedad di actividad, manera sacrificio, jaagmento, captura, piscamento y investigacion medico of cientifico.
E ley tin un castigo di boet halto y prizon pa 7 aña.
Representante democrata Ted Deutch a bisa cu crueldad animal no ta solamente inaceptabel, pero ta ilegal. “Awo por bisa finalmente cu maltrato di bestia ta un delito federal na Merca.”
Ashley Nicole Richards a filma su mes torturando y mutilando bestia chikito pa satisfaccion sexual. El a declara su mes culpabel pa cargo federal na 2015. Riba e video tabata mira Richards cu tiki paña bisti ta hinca bestia indefenso manera cacho, pushi y un galiña. Tin biaha tabata corta nan y pishi riba nan, mesun ora cu tabata bisa comentario sexual dilanti e camara.
