For di ayera, Donald Trump a yega Washington pa huramenta awe como e presidente number 45 di historia di Merca. Su nombramento ta crea tambe un ambiente di incertidumber den e region Latino America y Caribe.

Sr. Trump su instalacion ta uno masha singular como su personalidad mes.  E ceremonia di huramentacion dilanti di Congreso Mericano ta cuminsa den oranan di merdia  y e ta un echo cu ta wordo transmiti via Tv pa henter mundo. Fuente cercano na sr. Trump a bisa cu ainda diaranson ultimo, e tabata trahando riba e detayenan di su discurso cu lo dura alrededor di 20 minuut. El a consulta algun historiadonan y empresa di asesoria cu a yega di analisa e discursonan di otro presidentenan. Sean Spicer, kende lo bira vocero di Cas Blanco, a divulga na prensa internacional cu e discurso di sr. Trump no lo bira un programa detaya di su gobernacion. Sino mas bien un documento filosofico di su vision riba futuro di Merca y e rol di cada ciudadano di su pais.

Un cantidad grandi di invitadonan entre nan simpatisantenan y opositornan di e mandatario nobo lo asisti na e ceremonia aki cu lo conta cu presencia di dirigentenan politico di Merca y tres ex-presidente: Jimmy Carter, George W. Bush y Bill Clinton kendenan a confirma nan presencia. E ultimo lo ta  hunto cu su casa, Hillary Clinton, kende a perde dilanti Trump durante e ultimo eleccion controversial na Merca. Mientras cu ex-presidente  George Bush Sr. no lo ta presenta, ya cu e ta interna den hospital.

Sinembargo un tercera parti di e legisladonan Democrata di oposicion no lo asisti na e ceremonia di instalacion presidencial aki. Mientras cu den  Senado e Democratanan lo trata di haci mas dificil cu varios miembro di sr. Trump su gabinete lo wordo confirma den nan cargo nobo.

Oposicion Democrata a cuminsa organisa su mes sin Obama ainda. Sinembargo e presidente saliente a lansa un advertencia diaranson ultimo na su sucesor. Sr. Obama di 55 aña a reitera cu e no lo hinca su  mes regularmente den e wega politico di sr.Trump. Pero den caso cu e presidente nobo kier bay mas leu di e linea cora, e lo t’ey.

Un figura controversial
Sin experiencia politico ni militar, sr, Trump di 70 aña kende a bira e mandatario mas bieu cu ta asumi presidencia di Merca, a wordo eligi danki na su  conducta  bruto y directo cu sigur lo influencia e ambiente politica di otro paisnan, incluso esun di Aruba den e aña electoral aki. Nan votadonan  mayoria di nan di e clasenan popular di Merca, a pone den Cas Blanco pa bin cu un ordo mundial nobo cu lo cambia e status quo politico mundialmente.

E impopularidad di Trump pa su conducta durante e periodo di transicion -despues cu el a gana eleccion dia 8 di november ultimo- ta uno di e mas halto durante e ultimo tres decadanan, compara cu otro mandatarionan.

Un sondeo di empresa Gallup a revela cu apenas un 44% di e Mericanonan ta aproba Trump su  conducta, compara cu otro tres presidente den e mesun periodo di transicion: Obama (83%); George W. Bush (61%); y Clinton (68%).

E magnate a priminti di cuminsa traha di biaha, ya caba el a organisa su team di trabou of gabinete completo.   E ultimo miembro tabata Sonny Perdue, ex gobernador di Georgia, kende a bira su secretario di Agricultura.

E prome nivel di gobierno lo mester wordo confirma prome pa e Congreso di Merca. Nan ta 15 integrantenan di e gabinete y shete otro funcion di e mesun nivel. Den e team cu Trump a scoge tin cuatro hende muhe, un  di color scur y ningun Hispano.  Aunke prome cu el a gana eleccion, sr. Trump a yega di  afirma cu e Latinonan ta stime y e ta stima e Latinonan, pero esaki tabata durante campaña.

Nos region
E triunfo electoral di sr. Trump a sosode meymey di cambionan politico den nos hemisferio. Gobierno ta mas habri na Brasil y Argentina a trece menos tension cu Merca. Igualmente Merca a logra normalisa su relacion cu Cuba.  Pero e instalacion awe di sr. Trump como presidente di Merca lo por trece cambio grandi den e relacion di Washington cu su bisiñanan di e continente aki. Sr. Trump su promesa di campaña di construi un muraya riba e frontera entre Merca  y Mexico ta sostene  e incertidumbre cu awe ta existi den nos region. Ademas di e menasa di deportacion masivo di inmigrantenan sin papel, aumento di proteccion comercial local, lo tin su efecto pa nos region Latino Americano y Caribe. Ya caba  Secretaria Ehecutivo di Comision Economico pa America Latina y Caribe (Cepal), Alicia Bárcena a bisa cu e paisnan Latino Americano, y specialmente Mexico mester tin un “strategia fuerte” pa mantene  e nivel di inversion stranhero den nan sector industrial, mas leu di e politica di proteccion nacionalista cu sr. Trump ta promove.

Tambe sr. Bárcena ta propone un politica industrial di mas largo plaso, como esun di China pa America Latina, cu nan economia a cay te un 1,1% di nan GDP na 2016, y nan ta spera cu crecemento di 1,3% so durante 2017. Encuanto e consecuencianan cu e gobierno di sr. Trump lo por tin pa economia di nos region, ehecutivo di Cepal a bisa cu casi tur pais di nos region a pusta riba liber comercio. Awor e futuro di e tipo di acuerdo aki, fundamentalmente cu Merca, ta den incertidumbre. E situacion aki lo por habri otro escenario economico mundial; ya cu si Merca no ta dicidi di participa activamente pa ehempel den e Acuerdo Transpacifico di Cooperacion Economico (TPP), of den otro acuerdonan di e mesun caliber, China eventualmente lo asumi un rol mas activo.

Nos ta pone punto final na e articulo aki, citando textualmente un di e famoso Twitter cu sr. Trump a divulga prome cu el a bandona su residencia na New York pa bay biba na Cas Blanco: “E biahe aki ta  cuminsa y mi ta bay traha y lucha hopi duro pa esaki por bira un biahe tambe pa e Mericanonan. Mi n’ tin duda cu hunto nos lo duna Merca su grandesa bek.”