Presidente sindicato ABV: ‘Mester baha e parti di ziekteverzuim’

Durante e di dos dia di congreso pa dialogo tripartite laboral, den cual gremio sindical, gremio comercial y gobierno ta traha hunto riba documento pa trata e ley ARBO, cu ta importante pa trahado y doño di trabou, presidente Sindicato a menciona particularmente problema cu ‘ziekteverzuim’.

Presidente di sindicato ABV, Gina Maduro a bisa cu pa parti di gobierno, un di e retonan mas grandi como e doño di trabou mas grandi na Aruba ta cu ora di compara sector publico cu sector priva, e ‘ziekteverzuim’ pa keda bay AO ta halto.

Maduro ta splica cu ta trabou di hefe di departamento di gobierno y di sindicato pa bay sinta cu cada representante di e trahadonan pa baha e ziekteverzuim, mirando cu ta costa placa y mester concentra riba productividad.

E ta bisa cu awendia tin 3 categoria cu hende ta bay pidi cu ta malo. E parti cortico, cu ta e parti cu por trata cu medicamento, of e parti mas largo manera kibra pia. Pero tin e parti ‘zwart’ of preto, caminda e trahado ta keda pidi cada dos dia, specialmente diabierna of dialuna, cual ‘ta yama boycott ziekte patron’.

Den e compania tambe tin e parti ros. Maduro ta duna di conoce cu esey ta e grupo cu ta presenta na trabou, pero no ta productivo. Nan ta negativo, nan no ta contento cu doño di trabou of cu departamento.

Con ta combati esaki?
Segun Maduro, mester bin cu un bon maneho conhuntamente cu sindicato y manager di recurso humano, pa traha un plan hunto, asina por baha e parti di ziektverzuim. “Principalmente esun di zwart”, pa asina por aumenta productividad. “Pasobra cada biaha cu tarda ta costa e doño di trabou mas placa. Tampoco por pone otro trahado pa haci trabou di dos y tres hende.” Esaki pa motibo cu despues di tempo e mesun colega ey tambe ta fada, burn out, cansa, of haya demasiado stress, resultando den ‘un reto pa tur hende’. Maduro ta bisa cu mester ta consciente y ta kere cu como sindicato nan ta pa derecho di cada trahado, pero tambe ta nan deber pa cumpli.

Un ehempel cu el a menciona ta na trabou den un compania di construccion, e hefe mester tin e material necesario pa proteha su trahado y evita algun accident. Sinembargo ta keda na cada trahado pa cumpli di bisti e material necesario y cuida su mes manera mester ta. Si e persona no haci uzo di e material lo pone sancion.