Presidente Colombiano, Juan Manuel Santos a manda su mensahe pa nan compatriotanan cu ta biba den exterior den cuadro di 207 aniversario di independencia di nan pais cu ta wordo conmemora awe.
Asociacion Amigo de Colombia (ASOCOL) ta conmemora awe Dia di Colombia cu un acto simbolico cu ta tuma luga pa 10’or di mainta na Plaza Simon Bolivar. Diadomingo awor nan lo tin un evento na Villa Floralina for di 12’or di merdia te cu 9’or di anochi.
Mensahe
E mandatario a destaca e esfuerso di su gobierno pa trece un ambiente di paz den nan pais. Den su mensahe presidente Santos a bisa cu aña pasa riba e mesun fecha el a menciona cu su gobierno a bay di acuerdo cu e organisacion guerrillero Farc pa stop e confrontacion bilateral y definitivo cu ehercito di Colombia y pa nan entrega nan armanan.
Pero awe pa e alegria di tur Colombiano e por bisa cu e anuncio cu el a haci un aña pasa a bira un realidad definitivo y cu no tin paso atras. E ta algo cu ta yena nan di speransa y di fe pa futuro. E mandatario di e Colombianonan a laga sa cu awor cu e conflicto arma cu Farc a stop, esaki ta evita cu miles di nan compatriotanan ta sigui muri. “Nos a logra loke hopi tempo pasa nos tabata considera imposibel”, asina el a expresa den su mensahe pa tur Colombiano den exterior.
Tambe sr. Santos a bisa cu su gobierno a firma un acuerdo nobo di paz cu a tene cuenta cu e inkietud cu a keda manifesta pa medio di un consulta popular. Nan a cuminsa cu e implementacion di e inkietud aki y un luna pasa Farc a entrega su armanan di candela na e representantenan di Nacionnan Uni. “Na e comunidad internacional, organisacionnan y paisnan amigo cu a compaña nos, masha danki pa nan apoyo”, el a bisa.
Sr. Santo a expresa tambe cu awe Colombia ta un pais nobo. Sinembargo nan ta un pais cu tin nan problemanan di siguridad, desigualdad, desaroyo, y otro mas. Pero sin duda ya nan no ta sigui carga e problema pisa di un guera interno cu a laga dolor y atraso so. “Awor ta toca nos tur lanta e bandera y laga un banda nos odio y desacuerdo, y uni nos mes pa construi un nacion riba un fundeshi solido manera semper nos a soña. Un nacion unda e oportunidadnan ta alcansa tur hende. Tanto ciudadnan, pueblonan y sitionan masha leu unda presencia di nos estado no por a yega pa causa di violencia.”
Tambe el a laga sa cu e pueblo Colombiano a logra hopi a pesar di e conflicto cu nan a yega pasa aden. Pero awe cu nan a logra paz, nan por logra ainda mucho mas pa reduci pobresa y desigualdad y pa trece prosperidad. Igualmente el a indica cu awor cu Colombia ta gosa di paz nan por bira un pais unda inversion lo crece y esaki ta trece cu ne fuente di trabou digno pa tur Colombiano. Ademas nan por bira un pais cu mas turismo unda tanto hende stranhero como local por disfruta di nan pais bunita.
“Un pais unda nunca mas, nunca mas, nos ta mata nos mes pa nos ideanan. Un pais unda nos tur por pusha pa bay den un direccion so cu ta paz, progreso y husticia.” Un Colombia cu ta wardando riba nan ‘compatriotanan stima cu ta biba den exterior cada biaha cu nan kier bishita nan pais of nan kier bolbe definitivamente’. El a cera su discurso bisando cu 207 aña pasa Colombia a logra los di e dominio di un imperio. Y awe nan por bisa cu nan a los for di guera cu ta contribui pa Colombia por desaroya nan potencial como e nacion cu nan lo desea di ta.
