(AP) — Presidente Vladimir Putin a yega Nort Korea diaranson mainta, segun agencianan noticiero Ruso a reporta, despues cu el a bisa cu ambos pais kier coopera cercanamente pa surpasa sancionnan lidera pa Merca den cara di confrontacionnan intensificando cu Washington.
Lider Nort Koreano, Kim Jong Un a ricibi Putin na aeropuerto di Pyongyang, segun e noticieronan.
Putin, realisando su prome biahe na Nort Korea den 24 aña, a bisa den comentarionan cu a aparece den medionan estatal prome cu el a aterisa, cu e ta aprecia e sosten firme di e pais pa su accionnan militar na Ucrania. E Kremlin a lansa un invasion di escala completo na e pais bisiña na 2022.
El a bisa cu e paisnan lo continua “opone resolutamente” loke el a describi como ambicionnan Occidental “pa stroba e establecimento di un orden mundial multipolar basa riba husticia, respet mutuo pa soberania, considerando interesnan di cada un.”
Bishita di Putin ta yega memey di preocupacion aumentando tocante un acuerdo di arma den cual Pyongyang ta provee Moscu cu municionnan hopi necesario pa fuel e guera di Rusia na Ucrania, a cambio di asistencia economico y transferencia di tecnologia cu lo reforsa e menasa presenta pa programa di arma nuclear y misil di Kim.
Den capital Nort Koreano di Pyongyang, cayanan tabata decora cu potret di Putin y bandera Ruso. Un borchi riba un edificio tabata bisa” “Nos ta duna caluroso bon bini na presidente di Federacion Ruso.”
Putin tambe a bisa den su comentarionan publica cu Rusia y Nort Korea ta bay desaroya sistemanan di comercio y pago “cu no ta controla pa Occidente”, y conhuntamente opone sancionnan contra e paisnan, cual el a describi como “restriccionnan unilateral ilegal.”
John Kirby, vocero di Conseho di Seguridad Nacional Mericano, a bisa cu e profundisacion di e relacion ente Moscu y Pyongyang ta preocupante, “no solamente pa motibo di e impacto cu ta bay tin riba pueblo Ucraniano, pasobra nos sa cu ainda ta usando misilnan balistico Nort Koreano riba obhetivonan Ucraniano, pero pasobra por tin algun reciprocidad akinan cu por afecta seguridad riba Peninsula Koreano.”
