Den entrevista cu e corant Spaño El País, e presidente di Peru, Pedro Pablo Kuczynski ( naci na Lima na 1938), cu ta casi cumpliendo un aña di mandato, a haci un proposicion pa e conflicto Venezolano entre gobierno y oposicion. Esaki meymey di varios otro tema cu ta toca bida politico di su mes pais, unda el a asumi e cargo na juli 2016, prometiendo un “revolucion social” cu segun e mes ta continua siendo un di e obhetivonan central di legislatura.

Kuczynski, popularmente conoci como PPK – e letternan inicial di su nomber Pedro Pablo Kuczynski, a percura pa e partido cu el a lanta tin e mesun siglanan: Peruanos Por el Kambio.  Kuczynski, ex-economista di Banco Mundial y forma na Oxford y Princeton, a ricibi Francesco Manetto, periodista di e diario El País di Spaña na Palacio di Gobierno na Lima algun siman pasa, unda el a expresa su preocupacion pa e situacion na e pais den crisis severo.

Un arbitrahe pa e crisis Venezolano
Segun e periodista Manetto e presidente di Peru ta mustra cu e ta especialmente duro cu gobierno di Nicolás Maduro, y preocupa pa e situacion di crisis institucional den cual venezuela ta pasando. Den su opinion, “e tema fundamental ta cu mester libera tur e presonan politico.” “Si no ta haci esaki, no ta posible di tin un dialogo,” e ta considera.

“Si haci esey, loke ta un proridad haltisimo, mi ta kere cu por hacie asina cu tres pais amigo di democracia ta nombra algun asesor, y tres pais di e otro banda taambe ta nombra hende. Cuba, Nicacragua y Bolivia, y Peru, Chile, Colombia o Brasil di otro banda. Tres di un banda, y tres di e otro. Y haci un arbitrahe. Mester ta hende di prestigio haltisimo cu ta dispuesto di sinta pa siman o lunanan largo, tratando di busca un entendimento y un transicion.  Obviamente nan no ta bauy sinta na Venezuela. Nan por sinta na Curaçao.”

Esaki ta e propuesta di e presidente Peruano, cu ta mira den Unasur “un grupo demasiado inclina pa un banda,” igualmente e ‘Centro Estratégico Latinoamericano de Geopolítica (CELAG). “Mi ta kere,” e ta resalta, “cu mester haci algo pasobra e ‘bario’ (refiriendo na e region) no por tin un pais asina importante cu ta hundiendo estrepitosamente, y ta e pais cu tin e reservanan di petroleo mas grandi mundo.”