Den e tratamento di presupuesto complementario 2016 ayera a surgi un intercambio bastante fuerte entre un parlamentario di oposicion y un persona den publico, y cu presidente di parlamento. Pa basta rato un persona den publico cu obviamente tabata na fabor di gobierno, tabata molestia durante intervencion di e parlamentario. Un dado momento e parlamentario a rabia di tal forma cu el a dirigi palabra directamente na e persona molestoso aki. Esaki a desata un intercambio di palabra fuerte entre e  parlamentario y e presidente, unda e ultimo kier a mustra e parlamentario riba su obligacion pa dirigi palabra na su persona como presidente. E fayo garafal di e presidente tabata cu di su mes iniciativa e no a coregi e metemento intolerabel for di tribuna den e debate. Ta te ora e parlamentario a reclama cu e presidente no ta haci esaki, na un manera masha cortes, y casi timido, el a notifica e persona en cuestion cu no ta permiti pa interveni den e debate.

Esaki no ta prome biaha cu nos ta mira e presidente aki cu ta mustra por lo menos un debilidad grandi den dirigencia di orden den sala, pa no papia di un incapacidad total pa mantene orden. Pero, esaki ta solamente debilidad, o ta algo mas? Loke nos por observa pa hopi aña caba, cu e presidente di turno semper ta faborece esnan cu ta bin pa haci bochincha na fabor di e parti gubernamental. Y e faboritismo no ta limita na esey. Reunion pidi pa oposicion semper ta haya e mesun trato irasonabel unda cu ta cuminsa pa pospone e peticion pa lunanan largo sin cu tin un motivacion debido. E no tin otro splicacion cu e ta termento, pero no di mucha entre nan, pero den e caso aki den e institucion cu ta gusta yama su mes e ‘organo mas halto’ unda un presidente no por o no kier asumi su responsabilidad y ta insisti di hunga e papel dudoso cu aparentemente su partido y fraccion ta spera di su persona. Di e manera aki no ta bin nunca un mehoracion. Ki dia nos por spera di haya un presidente cu di berdad ta tuma tur hende den parlamento na serio ( no e publico riba tribuna) y ta trata tur hende por igual? Asina dificil esey ta?

Pero ban pasa pa e parti di contenido di e debate. Ta mas cu obvio cu e situacion financiero di gobierno na e momento aki riba papel ta mustra di bay cumpli cu e norma pa e deficit cu ta poni den ley di supervision financiero (-2,0%). Esey por ta e caso, pero no ta deshaci di loke nos tin nos dilanti. Esey ta e situacion economico actual unda tin diferente indicacion cu nos ta den un situacion di recesion. Segun ministro Bermudez den e debate di ayera e no ta haya cu e situacion actual ta califica como ‘recesion’. Loke ta trece nos riba e pregunta: ki ora nos ta papia di recesion? Segun normanan internacional, nos ta papia di un recesion economico si tin dos kwartaal sigui den cual e GDP real a cay. E problema den e caso di Aruba ta cu nos no ta custumbra di tin cifra di GDP disponibel cada tres luna.  Den otro pais miho ekipa pa esaki si ta duna cifra di desaroyo di GDP un tempo cortico despues cu e kwartaal termina. Loke en todo caso si a tuma luga ta cu Banco Central a mehora capacidad cu ta duna nan e posibilidad di duna den e aña mes caba un bista riba con economia ta andando. Esaki a hiba na e constatacion cu e proyeccion economico pa e aña no ta crecemento, sino un retroceso di casi 2% di GDP nominal. Loke a desvia atencion di hopi hende tabata cu a duna tambe un proyeccion chikito positivo di e GDP real (0,4%) a base di e deflacion tumando luga e aña aki.

Ban bolbe un rato na e asunto di recesion. Consulta di e rapportnan di cada kwartaal di gobierno pa supervision financiero ta mustra cu den e prome kwartaal di 2016 caba e tipo di impuesto cu ta indica crecemento o reduccion economico tabata duna impresion di a keda atras compara cu e aña anterior. Nos ta papia aki di impuesto di importacion, diferente accijns, BBO. Si awor Banco Central ta papia di un recesion ta pasobra nan a constata cu den e aña aki nos tin un caso di por lo menos dos kwartaal sigui cu economia ta bayendo atras. Nos no ta kere Banco Central ta uza un termino bon conoci pa nan sin cu nan a haci e investigacion debido di esaki.

Pakico e ministro ta mantene su opinion aki cu no tin recesion? Esey ta logico, pasobra si e admiti cu tin un recesion y sin embargo su ‘boekhouding’ di gobierno ta ‘chevere’, anto esey ta implica cu como gobierno abo ta percura pa bo ta bon, abo ta sacando bastante placa for di bo economia, pero bo economia no ta anda bon y a lo largo lo bay rindi menos.