“Nos sistema democratico ta asina, unda mayoria semper lo tin e poder pa dicidi. Sinembargo como presidente di parlamento bo mester salba interes di henter e parlamento. Bo no ta satisface tur hende tur ora.”
Parlamento a eligi dialuna su presidente nobo, esta Mervin Wyatt Ras (AVP). Vice presidente a bira Rene Herdé (AVP). 20 parlamentario a presente den sala. Cada un parlamentario a ricibi respectivamente 11 voto, despues di un procedura cu a cana debidamente y a bay basta trankilo. Pa inicia e proceso di votacion, a nombra un comision di investigacion den sala pa asina haci e proceduranan den miho forma manera conoci. E tres miembronan apunta pa e comision aki cual ta un trabao hopi importante, (controla procedura, haci conteo y anuncia resultado) tabata parlamentario Mervin Wyatt Ras como presidente anto e otro dos miembronan tabata Andin Bikker (PDR) y Evelyn Wever-Croes (MEP).
No ta prome biaha pa sra. Wyatt Ras fungi como Presidente di parlamento, pero el a haci esaki durante gobernacion di MEP ora e tabata miembro di e partido geel aki.
No por satisface tur hende
Algo cu seguramente no a wordo inventa pa ningun otro parlamentario incluyendo presidente di parlamento nobo ta e sistema Democratico, cu segun sra. Wyatt Ras ta uno unda mayoria semper lo tin e poder pa dicidi. “Nos sistema Democratico ta asina, sin embargo como presidente di parlamento bo mester salba interes di henter e parlamento. Bo no ta satisface tur hende tur ora. Bo mester para memey di tur y mi ta kere esey ta haci e un trabao cu no ta asina facil pero cu semper mester percura pa acudi cu tur banda di e medaya,” sra. Wyatt Ras ta bisa.
E discusion cu semper tin ora cu bo ta un presidente cu ta forma parti di e fraccion mayoritario ta cu lo duna esun mayoritario mas oportunidad anto segun Sra. Wyatt Ras esaki no mester ta necesario. “Mi ta kere cu ora bo ta eynan como presidente di parlamento bo tin cu wak cu cada parlamentario tin nan interes of nan punto di bista cu bo tin cu tene cuenta cun’e. Na otro banda, a base di reglamento di ordo, ora cu tin un discusion anto e fraccion mayoritario no ta di acuerdo cu algo, esaki ta e parti di Democracia,” sra.Wyatt Ras ta splica Bon Dia Aruba.
Un democracia ta indica cu ta mayoria ta dicidi, kiermen e ora ey bo tin cu bay cu locual mayoria ta dicidi cual no tin di haber cu bo ta un presidente di tal partido of oposicion. Si e fraccion mayoritario ta pensa un cierto forma e ora ey bo tin cu tene cuenta cun’e, segun sra. Wyatt Ras ta splica Bon Dia Aruba. “Pa mi e ta un honor pa drenta den e funcion aki pa asina haci un trabao pa pais Aruba.”
Hopi problema cu imparcialidad den pasado
Lider di fraccion MEP Evelyn Wever Croes ta splica Bon Dia Aruba cu den su 7 aña den parlamento el a experiencia hopi problema cu imparcialidad. No solamente di e diferente presidente di parlamento cu a bin y bay, pero specialmente di e fraccion mayoritario y gobierno cu ta pone presion. “Den un situacion asina bo no por haci bo trabao drechi como parlamentario pasobra bo no ta haya informacion. Mi ta spera cu e biaha aki esey no bira e caso,” sra. Wever Croes ta bisa agregando cu e ta sigur cu sra. Wyatt Ras sa di e trabao pasobra el a haci esaki cuater aña caba pa locual e ta sigur di tin e conocemento y experiencia. “Mi deseo ta pa nos tin un presidente totalmente imparcial di 21 miembro y no solamente pa e fraccion di AVP. Con esaki ta bay nos tin cu wak ainda pero mi ta spera pa bienestar di parlamento, pa sra. Wyatt Ras keda un presidente imparcial y pa para duro ora gobierno pone presion riba cierto cos,” sra. Wever Croes ta bisa Bon Dia Aruba.
