(AP)—E presidente nobo di Iran a reapunta oficialnan educa na Merca cu a haya sancionnan di ONU 16 aña pasa como hefe di e departamento nuclear di e pais, segun telenoticia estatal a reporta ayera.
Mohammad Eslami, 67, lo continua su trabao como hefe di e programa nuclear civil di Iran y lo sirbi como un di e varios vice-presidente. E reapuntamento di Eslami pa presidente Masoud Pezeshkian ta bin mientras Iran ta keda bao sancion pisa pa e West despues di e collapse di un trato na 2015 cu a curva e actividadnan nuclear di Iran den un intercambio pa alivio di sancion.
Pezeshkian a bisa durante su campaña presidencial cu e lo purba rebiba e trato nuclear. ONU a sanciona Eslami na 2008 pa “participa den, directamente asocia cu of duna sosten pa e proliferacion di actividadnan nuclear sensitivo na Iran of pa e desaroyo di sistemanan di entrega pa armanan nuclear,” ora e tabata e hefe di e Entrenamento di Industrianan di Defensa y Instituto di Investigacion na Iran.
El a ser apunta como e hefe di e departamento nuclear di Iran pa prome biaha pa difunto presidente Ebrahim Raisi na 2021, prome cu esey, for di 2018, den e era modera di ex presidente Hassan Rouhani, Eslami a sirbi como minister di Transporte y Desaroyo Urbano.
Eslami tin diplomanan den ingenieria civil for di Detroit University of Michigan y University of Toledo, Ohio. Merca, Francia, Britania y Alemania a acusa Iran di escala su actividadnan nuclear mas cu e limite cu el a acorda na dje den e trato di 2015 y di fracasa pa coopera cu e watchdog nuclear di ONU, e International Atomic Energy Agency.
Iran a acusa Merca y su aliadonan di sigui aplica sancionnan economico cu mester a ser anula bao di e trato, y a insisti cu su programa nuclear ta pasivo y ta diseña pa genera electricidad y produci radioisotopes pa trata pashentnan cu cancer y ta keda bao monitoreo constante di IAEA.
Iran ta construyendo dos facilidad di poder nuclear pa suplementa su reactor operacional di 1,000-megawatt den e ciudad di Bushehr, cual a bay online cu ayudo di Rusia na 2011. Bao di su plan di energia den termino largo, Iran ta plania pa yega un capacidad di electricidad nuclear di 20,000-megawatt.
E nacion a enfrenta durante e ultimo lunas strobacion den coriente cu a afecta henter a pais.
