Presidente Michelle Bachelet a lamenta via su cuenta di Twitter, e atake nobo cu a tuma lugar na un parokia chikito di comunidad di Sutherland Springs, na Texas, caminda mas di binti persona a ser asesina. Bachelet a manda condolencia tambe pa famia di tur victima di e suceso aki y pa henter pueblo di Merca.
“E noticia di un tiroteo na Texas ta lamenabel. Mi ta manda mi condolencia sincero na tur famia di victima y henter pueblo di Merca,” e presidente a bisa.
E sucedido a tuma lugar banda di merdia, ora cu cerca di 50 persona den un iglesia, entre nan hende grandi y mucha chikito, tabata atende un celebracion religioso, manera semper.
Polis a informa cu 26 persona a muri durante e tiroteo, den cual e suheto cu a asesina hende aki, a muri tambe y su curpa a ser localisa den un auto.
E situacion aki ta, hunto cu un serie di atake y tiroteo cu a tuma luga den ultimo lunanan na Merca, incluyendo e masacre cu a ser protagonisa pa Stephen Paddock, caminda el a tira desde un camber di Hotel na Las Vegas, Nevada, dia 1 di october ultimo. Den e masacre ey 58 persona a muri y el a herida mas di 550 persona. Na e lugar tabatin mas di 22.000 persona, cu tabata scuchando un concierto di musica country.
