E coalicion Cambiemos cu ta apoya presidente Mauricio Macri a vence esun di e opositor Kirchnerismo (cu raiz di peronismo, di centro-izquierda) den 15 di 24 provincia, incluyendo e cinco nan mas grandi di e pais: Buenos Aires, Córdoba, Mendoza, Santa Fe y e distrito federal di e capital. Ex-mandatario Cristina Fernández, viuda di Kirchner, lo bolbe den Congreso.

“No ta un partido a gana, e certesa cu nos por cambia historia, construi cu amor, a gana. Un Argentino cu gana no tin limite, nos ta imparable,” Macri a declara encabesando e celebracion na sede di campaña di Cambiemos, un coalicion di centroderecha.

E ex- mandatario Cristina Fernandez Kirchner (2007-2015)  a bolbe riba escena politico cu un asiento den Senado, sigurando asina e inmunidad parlamentario, awor cu e ta acusa den algun caso di corupcion.

“Ta Unidad Ciudadana (UC) so a crece desde e primaria (di augustus) y a surgi como e oposicion mas firme. Esaki lo ta e base pa construccion di e alternativa pa gobierno actual. Aki nada no a caba, aki tur cos ta cuminsa,” el a manifesta na su partidarionan.

Te awor Macri tabata goberna cu un minoria – 87 di 257 diputado y 15 di 72 senador – danki na aliansa cu otro partido.Segun e proyecionnan actual e por haya 107 diputado, mientras cu oposicion lo keda cu 145. E cuatro asientonan habri ainda lo ta pa otro forsanan politico.

78% di 33,1 miyon Argentino yama pa vota a acudi na e urnanan pa renoba mita di e 257 asientonan di Camara di Diputado y un tercio di e 72 asientonan di Senado.

E bataya mas duro tabata den provincia di Buenos Aires, cu tin casi 40% di e registro electoral. E candidato di Cambiemos, Esteban Bullrich, a gana cu 42% di voto, mas cu e 37% di Kirchner, di partido Unidad Ciudadana. Pero e resultado aki a garantisa e ex-mandatario, di 64 aña, un di e tres asientonan di Senado cu tabata den wega den e distrito aki.

E presidente a involucra su mes completamente den e campaña electoral y a apela continuamente na e cambio cu, na su huicio, e frente Cambiemos ta representa, despues di 12 aña di gobierno Kirchnerista.

Apesar cu hopi hende ta mira e resultado como un fracaso pa ex-presidente Cristina Fernández pasobra e no a logra iguala su resultado den eleccion provincial di dos aña pasa, desde su asiento den Senado e por bolbe bira e lider opositor mas fuerte, loke por yuda recupera poder y acumula forsa pa campaña electoral di 2019. 

Ademas, su regreso den Senado lo permitie obtene e inmunidad necesario pa resisti contra Husticia, unda e tin varios caso den su contra habri ainda, pa hechonan cometi durante su mandato.