Presidente Pedro Pablo Kuczynski di Peru a sobrevivi un votacion pa destitucion diahuebs anochi, despues cu 10 miembro di un partido di oposicion di extremo derecho na ultimo momento a dicidi di kibra fila di partido y a abstene di vota, na luga di vota pa e medida controversial.

Setenta y ocho representante a vota na fabor y 19 contra. Esey tabata menos cu e dos tercera parti, 87 di e 130 votonan total cu e parlamento di un solo camara ta conta.

E resultado di sorpresa, banda di 11or di anochi, despues di un sesion maratonico cu a cuminsa 9:30am a laga e partido Fuerza Popular di Keiko Fujimoro, cu ta domina e Congreso, ta lembe nan heridanan despues cu nan a pusha duro pa logra e destitucion di Kuczynski.

Sin embargo, e situacion ta laga Kuczynski manera un lame duck, net 17 luna den su periodo presidencia di 5 aña. Mientras tanto Peruanonan comun y coriente a keda disgusta cu henter e clase politico, cu e Congreso y e presidente disfrutando porcentahe di aprobacion den encuesta casi na suelo.

Loke por a influencia e resultado tabata e posicion fuerte di e presidente, cu si e wordo destitui, ningun di su dos vice-presidentenan lo a asumi presidencia, efectivamente forsando eleccion nobo, un scenario cu poco miembro actual di Congreso lo ta desea.

Kuczynski su oponentenan a bin cu documento siman pasa pa mustra cu e empresa Odebrecht, e gigante Brasileño den construccion cu ta centro di e scandal mas grandi den historia di Brasil y Latino America, a haci pagonan di como US$ 800.000 na Kuczynski su empresa di inversion Westfield Capital. Algun di e pagonan a tuma luga durante su periodo como ministro di asunto economico y prome ministro, mientras Odebrecht tabata haya contractonan grandi di sector publico.

E notorio scandal di Odebrecht, den cual e compania aki a admiti di a paga como US$ 800 miyon na soborno na funcionarionan halto den mas di 12 pais di America Latino pa sigura contracto grandi di infrastructura di sector publico, a sacudi e region y a causa prizon pa un cantidad grandi di funcionario halto, incluyendo ministro y presidente.